Bathukamma Celebrations | ఎతుబార్‌పల్లిలో అంబరాన్నంటిన బతుకమ్మ సంబరాలు..

Bathukamma Celebrations | రంగురంగుల పూల బతుకమ్మలు.. కళాకారుల జానపద గీతాలు.. మహిళలు, పురుషుల ఉత్సాహభరిత నృత్యాలతో రంగారెడ్డి జిల్లా మొయినాబాద్ మండలం ఎతుబార్‌పల్లి గ్రామంలో బతుకమ్మ సంబరాలు అంబరాన్నంటాయి.

Bathukamma Celebrations | మొయినాబాద్, అక్టోబర్ 16: రంగురంగుల పూల బతుకమ్మలు.. కళాకారుల జానపద గీతాలు.. మహిళలు, పురుషుల ఉత్సాహభరిత నృత్యాలతో రంగారెడ్డి జిల్లా మొయినాబాద్ మండలం ఎతుబార్‌పల్లి గ్రామంలో బతుకమ్మ సంబరాలు అంబరాన్నంటాయి. శుక్రవారం రాత్రి గ్రామమంతా పండుగ వాతావరణం నెలకొంది. గ్రామ సర్పంచ్, సర్పంచుల సంఘం మండల అధ్యక్షుడు, బీఆర్ఎస్ సీనియర్ నాయకుడు చింతకింది ప్రవీణ్ రెడ్డి ఆధ్వర్యంలో వేడుకలను ఘనంగా నిర్వహించారు.

బతుకమ్మ ఉత్సవాలను పురస్కరించుకుని గ్రామంలో నూతనంగా నిర్మించిన గ్రామ పంచాయతీ భవనాన్ని స్థానిక ఎమ్మెల్యే కాలె యాదయ్య ప్రారంభించారు. అనంతరం గ్రామంలో బతుకమ్మ సంబరాలు అట్టహాసంగా కొనసాగాయి. బతుకమ్మ వేడుకల్లో మహిళలంతా ఒకే రకమైన చీరల్లో కనిపించాలనే ఉద్దేశంతో గ్రామంలోని మహిళలకు సర్పంచ్ చింతకింది ప్రవీణ్ రెడ్డి ఆకుపచ్చ రంగు చీరలను పంపిణీ చేశారు. మహిళలు ఆ చీరలను ధరించి వేడుకల్లో పాల్గొనడం ప్రత్యేక ఆకర్షణగా నిలిచింది.

కళాకారిణి నిర్మలా రాథోడ్ బృందం ఆలపించిన బతుకమ్మ, జానపద పాటలు వేడుకల్లో ఉత్సాహాన్ని నింపాయి. కళాకారుల పాటలకు అనుగుణంగా మహిళలు, పురుషులు కలిసి నృత్యాలు చేస్తూ సందడి చేశారు. గ్రామ ప్రజలంతా పెద్ద సంఖ్యలో పాల్గొనడంతో ఉత్సవ ప్రాంగణం కోలాహలంగా మారింది. రాత్రి 10 గంటల వరకు వరకు వేడుకలు కొనసాగాయి. సంప్రదాయ బతుకమ్మ పాటలు, ఆటపాటలతో ఎతుబార్‌పల్లిలో పండుగ శోభ వెల్లివిరిసింది.