‘నువ్ ఈ ఇంట్ల ఉన్నంత కాలం మేం జెప్పినట్లె చెయ్యాలె. ఎన్నిమాటలన్నా.. కొట్టినా, తిట్టినా కుక్కిన పేనులా ఇంట్ల పడుండాలె. కాదని ఎదురు తిరిగితే.. కాట్లో కలిసిపోతవ్’ అనే వార్నింగ్లు చిన్నప్పుడు బాగా వినిపించేవి. కొత్త కోడల్ని సాధించుకోవడానికో.. అమాయకులపై పెత్తనం చెలాయించడానికో.. ఇట్లాంటి పదాలు ఉపయోగించి చెప్పుచేతల్లో ఉంచుకునేవారు. ఈ పదబంధంలో ‘కుక్కిన పేను’ గురించి తెలుసుకుందాం. తలలో ఉన్నప్పుడు పేనుదే రాజ్యం. పట్టుకోవడానికి ప్రయత్నిస్తే.. దొరికినట్లే దొరికి అంతలోనే మాయమైపోతుంది. ఒక్కసారి దొరికిన తర్వాత.. తీసి కుక్కితే ఇక కదలదు. ఉన్నచోటనే చచ్చి పడుంటుంది. అమాయకులను మెల్లిగా తమ దారిలోకి తెచ్చుకొని.. వారిపైనే పెత్తనం చెలాయిస్తుంటారు కొందరు. అలాంటివారిలో మాయలో పడితే.. కుక్కిన పేనులా అలా పడి ఉండటమే. చేసేది ఏమీ ఉండదు. తై అంటే.. తై అనాలె.. లేకుంటే ఊకుండాలె.