జీవ భాష

నేడు అంతర్జాతీయ మాతృభాషా దినోత్సవం

నేడు అంతర్జాతీయ మాతృభాషా దినోత్సవం

ఎంత తీయనిదమ్మ మన మాతృ భాష
ఎంత చక్కనిదమ్మ మన తెలుగు భాష

పాలధారల కన్నా మిన్నైన భాష
పొగడపూల కన్నా సొగసైన భాష
అమ్మ ఒడిలోన ఓనమాలు దిద్ది
ఉంగ ఉంగాంటూ ఊసులాడే భాష

పసిపాప నగవుల్లో వెన్నెలలు కురిపించు
గోరుముద్దలలోన మురిపాలు నింపు
తేనెలూరేను తేట తెలుగులోనే
నీటి తేట ఊటై పొంగి పొర్లేను

ఉయ్యాల తొట్టిలో ఓలలాడిన భాష
జోల పాటల్లో పల్లవించిన తెలుగు
ముత్యమై మెరిసేటి ముద్దులొలుకు భాష
అందమైన తెలుగు మన అమ్మ భాష

రమణీయ శ్రవణంతో కమనీయ వచనం
సొగసైన రాగంతో ఎద పలికే గానం
మధుర లిఖితమౌ మన భాష తెలుగు
తలపులోన మెదిలి కవితలెన్నో కూర్చు

పెరటిలో విరిసిన ముద్దబంతుల తీరు
బంగారు వర్ణమై రంగులీను భాష
సంగీత స్వరధనులు శబ్దించు నా భాష
ఆట పాటల్లోన అలలారే తెలుగు
అమ్మ ప్రేమలోని కమ్మదనమంతా
మన భాషకు గాక మరిదేనికుంది

పలుకు పలుకులోన మమతలద్దిన భాష
మమకార మాధుర్యం పండించు తెలుగు
భావ సంద్రమై బాసించు భాష
పలకరింపులతోనే మనసులెన్నో గెలుచు

పరభాషల వెంట పరుగుబెట్టుటయేల
మన భాష మనుగడకు అడుగిడు బాల
దేశభాషలందు తెలుగు లెస్స భళా
ఏ భాషకు లేని ఘనకీర్తి గల తెలుగు

నెల్లుట్ల సునీత
79894 60657