గులాబీ జెండా ఎగిరెనోయ్‌

గులాబీ జెండాఎగిరెనోయ్‌ కోట్లాది గుండెలు మురిసెనోయ్‌ తెలంగాణ తల్లి మోమున నూతన కాంతులు విరిసెనోయ్‌

గులాబీ జెండాఎగిరెనోయ్‌
కోట్లాది గుండెలు మురిసెనోయ్‌
తెలంగాణ తల్లి మోమున నూతన
కాంతులు విరిసెనోయ్‌ ||గులాబీ||

చరణం 1:
అణువు అణువున పౌరుషత్వం
కణము కణమున సాహసత్వం
మాటలోన అమృతత్వం
మనసులోన సాధుతత్వం
వాసిగల్గిన తెలంగాణ వారసత్వం సోదరా
వీరచరితల తలుచుకొని అ(స)మరగానము సేయరా

చరణం 2:
జీవనదుల జీవిక.. భూగర్భ గనుల పేటిక
హరితవనముల వాటిక.. శ్రమైక జీవన వేదిక
సకల వనరుల తెలంగాణ సర్వమూ కోల్పోయెరా
వలసవాదం చెరల చిక్కి వలవలా విలపించెరా
రాగవీణ తెలంగాణ రక్తధారల తడిసెరా ||గులాబీ||

చరణం 3:
నీళ్లు, నిధులు జారగొట్ట్టి.. కొలువులన్నీ కొల్లగొట్టి
కష్టజీవుల కడుపుగొట్టి.. యువత కలలను పాతిపెట్టి
ద్రోహమే అధికారమయ్యిదోపిడీని సాగించెరా
గుండె రగిలిన తెలంగాణ తిరుగుబాటై ఎగిసెరా
వేలాది అమరుల ప్రాణత్యాగం స్థూపమై వెలసిందిరా ||స్వరాష్ట్ర ||
మున్నూట అరవై ప్రాణాల త్యాగం స్థూపమై వెలిసిందిరా

చరణం 4:
పెరిగి విరిగిన పోరు కెరటం
పునర్జీవము పొందెరా
మేలుకొని మేధావిలోకం
విత్తనాలెగజల్లెరా
రాజకీయ పటిమ చాటుతూ ఉద్యమం ఉరికిందిరా
శాంతి పథమున క్రాంతిరథమై లక్ష్యమును చేరిందిరా
తరతరాల తపన తీరగ గమ్యమును ముద్దాడెరా

చరణం 5
వంచనే తలవంచుకున్నది
కుట్ర మొగమును దించుకున్నది
కటిక చీకటి తప్పుకున్నది
కాంతిపురులను విప్పుకున్నది
భారతావని ముద్దుబిడ్డయి-పుట్టినది నవరాష్ట్రమూ
స్వేచ్ఛ కోసం పోరిన తెలంగాణ వీరచరితమూ
భూమిపుత్రుల ధీరచరితలో సువర్ణాక్షర లిఖితమూ.