లండన్: ఒక రోబో వాక్యూమ్ క్లీనర్ డ్యూటీ ఎగ్గొట్టింది. తెలివిగా రోజంతా తప్పించుకున్నది. ఆశ్చర్యపరిచే ఈ ఘటన బ్రిటన్లో జరిగింది. కేంబ్రిడ్జ్లోని ఆర్చర్డ్ పార్క్లో ఉన్న ట్రావెలాడ్జ్ హోటల్లో శుభ్రత కోసం రోబో వాక్యూమ్ క్లీనర్లను వినియోగిస్తున్నారు. అయితే గురువారం డ్యూటీ సమయంలో ఒక రోబో క్లీనర్ మాయమైంది. హోటల్ సిబ్బంది ఎంత వెతికినా అది కనిపించలేదు.
దీంతో హోటల్ సిబ్బంది ఆందోళన చెందారు. సహాయం కోసం సోషల్ మీడియాను ఆశ్రయించారు. “ఈ రోజు మా కొత్త రోబోట్ వాక్యూమ్లలో ఒకటి తప్పించుకుని పారిపోయింది. సాధారణంగా రోబో వాక్యూమ్ క్లీనర్ హోటల్ ప్రవేశ ద్వారం వద్ద అపరిశుభ్రతను పసిగట్టి అక్కడే చుట్టూ తిరిగి శుభ్రం చేస్తుంది. కానీ ఈ రోబో అక్కడి నుంచి పరుగెత్తి పారిపోవాలని నిర్ణయించుకున్నది ” అని హోటల్ అసిస్టెంట్ మేనేజర్ రెడ్డిట్లో ఒక పోస్ట్ చేశారు.
అయితే ఒక రోజు తర్వాత ఆ రోబో వాక్యూమ్ క్లీనర్ హోటల్ సిబ్బంది కంటపడింది. హోటల్ ముందు భాగంలోని ఒక పొద కింద ఉన్న దానిని సిబ్బంది ఒకరు గమనించారు. దీంతో హోటల్ నిర్వాహకులు ఈ విషయాన్ని మీడియాకు తెలిపారు. ఆ రోబో వాక్యూమ్ క్లీనర్ ప్రస్తుతం మిగతా వాటితో కలిసి హ్యాపీగా ఉన్నదని పేర్కొన్నారు.