Visit:
Bonalu Festival | తెలంగాణ ప్రజల ఆధ్యాత్మికత, సంస్కృతి, సంప్రదాయాలకు ప్రతీకగా నిలిచే బోనాల పండుగను తొలిసారిగా జర్మనీలోని హ్యాంబర్గ్ నగరంలో ఘనంగా నిర్వహించారు. తెలంగాణ అసోసియేషన్ ఎన్ఆర్ఐ హ్యాంబర్గ్ (TANH) ఆధ్వర్యంలో జరిగిన ఈ వేడుకలు ప్రవాస తెలంగాణ వాసులను ఒకే వేదికపైకి తీసుకువచ్చి ఆధ్యాత్మిక, సాంస్కృతిక వాతావరణాన్ని సృష్టించాయి.
ఈ సందర్భంగా శ్రీ మహాకాళి అమ్మవారికి ప్రత్యేక పూజలు, సంప్రదాయబద్ధంగా బోనం సమర్పణ, డప్పు వాయిద్యాలు, లాస్య నృత్యాలు నిర్వహించారు. సంప్రదాయ దుస్తుల్లో పాల్గొన్న మహిళలు బోనాలు సమర్పించగా, చిన్నారులు, యువత సాంస్కృతిక ప్రదర్శనలతో ఆకట్టుకున్నారు.
కుటుంబ సమేతంగా హాజరైన తెలంగాణ సమాజ సభ్యులు భక్తిశ్రద్ధలతో అమ్మవారిని దర్శించుకుని, విదేశాల్లోనూ తెలంగాణ సంస్కృతిని సజీవంగా నిలబెట్టేందుకు ఇటువంటి కార్యక్రమాలు దోహదపడతాయని అభిప్రాయపడ్డారు.
ఈ సందర్భంగా TANH ప్రతినిధులు మాట్లాడుతూ, “భారతీయతను, తెలంగాణ సంస్కృతిని, భక్తి సంప్రదాయాలను ప్రపంచవ్యాప్తంగా చాటాలనే లక్ష్యంతో ఈ కార్యక్రమాన్ని నిర్వహించాం. భవిష్యత్తులోనూ మరిన్ని సాంస్కృతిక కార్యక్రమాలను నిర్వహిస్తాం” అని తెలిపారు.
