గాలీవాన బీభత్సం

ఉమ్మడి జిల్లాలోని పలు మండలాల్లో ఆదివారం సాయంత్రం ఈదురుగాలులతో కూడిన భారీ వర్షం కురిసింది. పలుచోట్ల చెట్లు విరిగి రోడ్లపై పడగా, మరికొన్ని చోట్ల ఇండ్లపైకప్పులు ఎగిరిపడ్డాయి. పొతంగల్‌ మండలం తిర్మలాపూర్‌, కోటగిరి మండలంలోని ఎత్తొండ క్యాంప్‌లో పలువురి ఇండ్ల పైకప్పులు ఎగిరిపడ్డాయి.

• ఉమ్మడి జిల్లాలో భారీ వర్షం
• కల్లాల్లో తడిసిన జొన్నలు
• ఎగిరిపోయిన ఇంటిపైకప్పులు

కోటగిరి (పొతంగల్‌)/గాంధారి/బిచ్కుంద/ సిరికొండ, జూన్‌ 7: ఉమ్మడి జిల్లాలోని పలు మండలాల్లో ఆదివారం సాయంత్రం ఈదురుగాలులతో కూడిన భారీ వర్షం కురిసింది. పలుచోట్ల చెట్లు విరిగి రోడ్లపై పడగా, మరికొన్ని చోట్ల ఇండ్లపైకప్పులు ఎగిరిపడ్డాయి. పొతంగల్‌ మండలం తిర్మలాపూర్‌, కోటగిరి మండలంలోని ఎత్తొండ క్యాంప్‌లో పలువురి ఇండ్ల పైకప్పులు ఎగిరిపడ్డాయి. మరికొందరి ఇండ్లపై చెట్లు పడగా ఇంట్లో ఉన్న సామాన్లు ధ్వంసమయ్యాయి. కొందరు తమ ఇండ్లల్లోకి వర్షపు నీరు చేరిందని వాపోయారు. ఎత్తొండ క్యాంప్‌లో ఓ తాటిచెట్టుపై పిడుగు పడింది.

గాంధారి మండలం బూర్గుల్‌ గ్రామంలో ఈదురు గాలులకు కంపోస్ట్‌ షెడ్డు కూలిపోయింది. గాంధారి మండలంతోపాటు బిచ్కుంద మండలంలోని పలు గ్రామాల్లో కల్లాలు,కొనుగోలు కేంద్రాల వద్ద ఉంచిన జొన్న కుప్పలు వర్షానికి తడిసిపోయాయి. పంటను కాపాడుకునేందుకు అన్నదాతలు నానా అవస్థలు పడాల్సి వచ్చింది. జొన్నల కుప్పల వద్దకు వర్షపు నీరు చేరకుండా కాలువలు తీసి తంటాలు పడ్డారు. ఈదురుగాలులకు బిచ్కుంద-బాన్సువాడ రహదారిపై చెట్లు నేలకొరిగాయి. దీంతో వాహనదారులకు రాకపోకలకు అంతరాయం ఏర్పడింది. సిరికొండలో మూడు గంటలపాటు వర్షం కురిసింది.