పిల్లాడిని నలిపేసిన ట్రెడ్‌ మిల్‌

మీ ఇంట్లో ట్రెడ్‌ మిల్‌ ఉందా ? అయితే జాగ్రత్త. పసిపిల్లలు, పెంపుడు జంతువులు ఉన్నవాళ్లు ట్రెడ్‌ మిల్‌ దరిదాపుల్లోకి రానీయకండి. అలా ట్రెడ్‌ మిల్‌ ఉన్నచోట పొరపాటున మీ పిల్లలు వస్తే ఎలాంటి ప్రమాదం పొంచి ఉందో చెబుతూ ఓ వీడియోని విడుదల చేసింది యూఎస్‌ కన్జ్యూమర్‌ ప్రొడక్ట్‌ సేఫ్టీ కమిషన్‌.

అక్కతో కలిసి ఆడుకుంటున్న చిన్నారిని ట్రెడ్‌ మిల్‌ అమాంతం లాగేసింది. చిన్నారి చేతులు ట్రెడ్‌ మిల్‌ కింద నలిగాయి. ఆ తర్వాత కాసేపటికే పిల్లాడు కూడా ట్రెడ్‌ మిల్‌ కిందకు వెళ్లిపోయాడు. నొప్పిని తట్టుకోలేక కాసేపు ఆ చిన్నారి గిలాగిలా కొట్టుకున్నాడు. అతి కష్టం మీద బయటకు రావడంతో ప్రాణాలతో బయటపడ్డాడు. ఏడ్చుకుంటూ అక్కడి నుంచి పరుగులు పెట్టాడు.

ఆ చిన్నారి అదృష్టం బాగుంది కాబట్టి ప్రాణాలతో బయటపడ్డాడు. లేదంటే చనిపోయేవాడు. ఇలాంటి ఘటనలు అమెరికాలో జరగడం ఇది మొదటిసారి కాదు. పెలటాన్‌ కంపెనీకి చెందిన ట్రెడ్‌ మిల్‌ ప్లస్‌ వల్ల ఒక చిన్నారి ప్రాణాలు కోల్పోగా 40మందికి పైగా చిన్నారులు గాయపడ్డారు. ఈ కంపెనీ ట్రెడ్‌ మిల్‌ ని వాడవద్దని ఇప్పటికే  అమెరికా కంజుమర్ ప్రొడక్ట్ సేఫ్టీ కమిషన్‌ ఆదేశించింది. అయితే  సదరు కంపెనీ ఈనిర్ణయాన్ని తప్పుబట్టింది. 16 ఏళ్ల కంటే తక్కువ వయస్సు ఉండే వ్యక్తులు దీన్ని ఉపయోగించకూడదని సేఫ్టీ రూల్స్‌ లో స్పష్టం చేశామని వివరణ ఇచ్చింది.