అనువాదాలు అదరహో

హీరో నితిన్‌ ఓ అరుదైన ఘనతను సాధించారు. హిందీలోకి డబ్బింగ్‌ చేసిన ఆయన సినిమాలు దక్షిణాది కథానాయకులందరి కంటే అత్యధిక వీక్షణల్ని పొందాయి. 2.3 బిలియన్ల (230కోట్లు) యూట్యూబ్‌ వీక్షణలతో నితిన్‌ చిత్రాలు అగ్రభాగాన నిలిచాయి. గత కొన్నేళ్లుగా తెలుగు సినిమాల హిందీ డబ్బింగ్‌ హక్కులకు భారీగా డిమాండ్‌ ఏర్పడింది. నిర్మాతలకు హిందీ అనువాద హక్కులు చక్కటి ఆదాయ వనరుగా మారాయి. శాటిలైట్‌ మరియు యూట్యూబ్‌ ఛానెల్స్‌ ద్వారా హిందీ ప్రేక్షకులు తెలుగు సినిమాల్ని విరివిగా వీక్షిస్తున్నారు. అదే వరుసలో హీరో నితిన్‌ తన సినిమాల ద్వారా అక్కడి వారికి చేరువయ్యారు. హిందీలోకి డబ్బింగ్‌ అయిన ఆయన సిమాలన్నీ కలిపి 230కోట్ల యూట్యూబ్‌ వీక్షణలు సాధించాయి. హిందీలో ఈ స్థాయి ఆదరణ పొందిన తొలి దక్షిణాది హీరో నితిన్‌ కావడం విశేషం. అలాగే నితిన్‌ హిందీ డబ్బింగ్‌ చిత్రాలు భారీ మొత్తాలకు అమ్ముడుపోవడంతో నిర్మాతలు కూడా ఆనందం వ్యక్తం చేస్తున్నారు. ప్రస్తుతం నితిన్‌ ‘మాచర్ల నియోజకవర్గం’ చిత్రంలో నటిస్తున్నారు. ఎం.ఎస్‌.రాజశేఖర్‌ రెడ్డి నిర్మాత. ఈ సినిమా హిందీ డబ్బింగ్‌ రైట్స్‌కు కూడా భారీ డిమాండ్‌ ఉందని సమాచారం.