హెచ్‌సీయూ క్యాంపస్‌ ప్లేస్‌మెంట్స్‌లో రికార్డు

కొండాపూర్‌, ఏప్రిల్‌ 22: గచ్చిబౌలిలోని హైదరాబాద్‌ సెంట్రల్‌ యూనివర్సిటీ విద్యార్థులు ఈ సారి రికార్డుస్థాయిలో క్యాంపస్‌ ప్లేస్‌మెంట్‌ ద్వారా ఉద్యోగాలు చేజికించుకున్నారు. నిరుడు 213 సంస్థల్లో 396 మంది విద్యార్థులు ఉద్యోగాలు పొందగా, ఈ ఏడాది 185 సంస్థల్లో 485 మంది విద్యార్థులు ఉద్యోగాలకు ఎంపికయ్యారు. వీరిలో అత్యధికంగా రూ.23 లక్షల వార్షిక వేతనంతో ఎంపికవ్వడం విశేషం. ప్లేస్‌మెంట్‌ గైడెన్స్‌ అండ్‌ అడ్వైజరీ (పీగాబ్‌) బ్యూరో ఇంచార్జీ ప్రొఫెసర్‌ సల్మాన్‌ అబ్దుల్‌ మోయిజ్‌ మాట్లాడుతూ.. వర్సిటీ చరిత్రలో ఇదే అత్యుత్తమం అని పేర్కొన్నారు. ప్లేస్‌మెంట్‌ ప్రక్రియలో సంస్థలు ఆన్‌లైన్‌ ద్వారా పరీక్షలు నిర్వహించడంతోపాటు ఇంటర్వ్యూలను జూమ్‌/గూగుల్‌ మీట్‌/టెలిఫోనిక్‌ ద్వారా నిర్వహించినట్టు ట్రైనింగ్‌ అండ్‌ ప్లేస్‌మెంట్‌ కోఆర్డినేటర్‌ ప్రేర్ణ అకౌరీ చెప్పారు. టీసీఎస్‌, డెలాయిట్‌, ఒరాకిల్‌, బైజూస్‌, ఆక్సెంచర్‌, నోవార్టీస్‌, నెక్ట్స్‌ ఎడ్యుకేషన్‌, క్వాడ్రాటీక్స్‌, ఫ్లిప్‌కార్ట్‌, సింక్రోని ఫైనాన్షియల్‌ తదితర సంస్థల్లో తమ విద్యార్థులు ఉద్యోగాలు పొందినట్టు వివరించారు.