Plastic Ban | ఎత్తొండలో ప్లాస్టిక్ నిషేధం.. గ్రామపంచాయతీ తీర్మానం

Plastic Ban | ప్లాస్టిక్‌ను నిషేధించాలని ఎత్తొండ గ్రామపంచాయతీ పాలకవర్గం తీర్మానం చేసింది. ఈ మేరకు ఓ హోటల్‌కు స్టీల్ గ్లాసులను సర్పంచ్ శ్వేత సూర్యకాంత్‌ అందజేశారు. పర్యావరణాన్ని కాపాడుకునేందకు ఈ నిర్ణయం తీసుకున్నామని అన్నారు.

Plastic Ban | కోటగిరి: పర్యావరణాన్ని పరిరక్షించాలనే సదుద్దేశంతో ‘ప్లాస్టిక్ వాడకం వద్దు స్టీల్ వాడకమే ముద్దు’ అనే నినాదంతో ప్లాస్టిక్‌ను నివారించేందకు నడం బిగించింది నిజామాబాదు (Nizamabad) జిల్లా కోటగిరి మండలం ఎత్తొండ గ్రామం. స్వాతంత్ర దినోత్సవం సందర్భంగా శనివారం స్థానిక సర్పంచ్ శ్వేత సూర్యకాంత్ అధ్యక్షతన పంచాయతీ పాలకవర్గం ఈ నిర్ణయం తీసుకున్నది. గ్రామంలో పర్యావరణాన్ని పరిరక్షించాలని ఉద్దేశంతోనే ఈ నిర్ణయం తీసుకున్నామని సర్పంచ్ శ్వేత తెలిపారు.

ఎత్తొండ గ్రామంలో ప్లాస్టిక్ గ్లాసులు, ప్లాస్టిక్ ప్లేట్లు వాడకంపై పూర్తిగా నిషేధిస్తామని సర్పంచ్‌ (Sarpanch) అన్నారు. గ్రామంలోని నాలుగు హోటళ్లకు 200 స్టీల్ టీ గ్లాసులను సర్పంచ్ తరఫున పంపిణీ చేశారు. ఇకమీదట గ్రామంలో హోటళ్లలో ప్లాస్టిక్‌ టిఫిన్ ప్లేట్లు, ప్లాస్టిక్‌ టీ గ్లాసులు వాడవద్దని యజమానులకు సూచించారు. స్టీల్ గ్లాసులు మాత్రమే వాడాలని నిబంధన పెట్టామన్నారు. కార్యక్రమంలో స్థానిక ఉపసర్పంచ్ నవీన్, వార్డు సభ్యులు షేక్ మస్తాన్, రమేష్, దండులాలు, భూమేష్ పాల్గొన్నారు.