Madhya Pradesh | ‘నో యూపీఐ డే’.. ఎండీఆర్‌ లెవీపై మధ్యప్రదేశ్‌ వ్యాపారుల నిరసన

మధ్యప్రదేశ్‌ వ్యాప్తంగా వ్యాపారులు బుధవారం ‘నో యూపీఐ డే’ను పాటించారు. తమ దుకాణాల్లోని క్యూఆర్‌ కోడ్లను నల్లని వస్త్రంతో కప్పి నగదు రూపంలో చెల్లించాలని వినియోగదారులను కోరారు. వ్యక్తులు-వ్యాపారుల మధ్య రూ.2 వేలకు పైన జరిగే లావాదేవీలపై 0.4 శాతం మర్చంట్‌ డిస్కౌంట్‌ రేట్‌(ఎండీఆర్‌) విధించాలన్న కేంద్రం నిర్ణయానికి వ్యతిరేకంగా వారు ఈ నిరసన చేపట్టారు.

భోపాల్‌ : మధ్యప్రదేశ్‌ వ్యాప్తంగా వ్యాపారులు బుధవారం ‘నో యూపీఐ డే’ను పాటించారు. తమ దుకాణాల్లోని క్యూఆర్‌ కోడ్లను నల్లని వస్త్రంతో కప్పి నగదు రూపంలో చెల్లించాలని వినియోగదారులను కోరారు. వ్యక్తులు-వ్యాపారుల మధ్య రూ.2 వేలకు పైన జరిగే లావాదేవీలపై 0.4 శాతం మర్చంట్‌ డిస్కౌంట్‌ రేట్‌(ఎండీఆర్‌) విధించాలన్న కేంద్రం నిర్ణయానికి వ్యతిరేకంగా వారు ఈ నిరసన చేపట్టారు. సుమారు 125 వ్యాపార సంఘాలు ఈ నిరసనలో పాల్గొన్నాయి. ఈ నిర్ణయాన్ని ప్రభుత్వం వెనక్కి తీసుకోవాలని అవి విజ్ఞప్తి చేశాయి. ‘ప్రభుత్వానికి వ్యాపారులు వ్యతిరేకం కాదు.

ఎండీఆర్‌ నుంచి వసూలు చేసిన డబ్బు ప్రభుత్వ ఖజానాలో జమ కానప్పుడు, వ్యాపారులపై ఈ అదనపు భారం ఎందుకు’ అని జాతీయ వ్యాపారుల సంక్షేమ బోర్డు మధ్యప్రదేశ్‌ ప్రతినిధి రమేశ్‌ ఖండేల్‌వాల్‌ ప్రశ్నించారు. అక్టోబర్‌ 15లోపు ప్రభుత్వం తన నిర్ణయాన్ని వెనక్కి తీసుకోకుంటే యూపీఐ క్యూఆర్‌ కోడ్‌ యంత్రాలను నీటి వనరుల్లో పడేస్తామన్నారు.