త్వరలో నంది అవార్డులు ఏపీ ప్రభుత్వం ప్రకటన

ఆంధ్రప్రదేశ్‌ ప్రభుత్వం తరపున నంది అవార్డులను ప్రదానం చేస్తామని సినిమాటోగ్రఫీ శాఖ మంత్రి కందుల దుర్గేశ్‌ ప్రకటించారు. ఈ సందర్భంగా మంగళవారం ఏపీ ఎఫ్‌డీసీ ఛైర్మన్‌ భరత్‌భూషణ్‌ విలేకరుల సమావేశాన్ని నిర్వహించారు.

ఆంధ్రప్రదేశ్‌ ప్రభుత్వం తరపున నంది అవార్డులను ప్రదానం చేస్తామని సినిమాటోగ్రఫీ శాఖ మంత్రి కందుల దుర్గేశ్‌ ప్రకటించారు. ఈ సందర్భంగా మంగళవారం ఏపీ ఎఫ్‌డీసీ ఛైర్మన్‌ భరత్‌భూషణ్‌ విలేకరుల సమావేశాన్ని నిర్వహించారు. ఆయన మాట్లాడుతూ ‘గతంలో ప్రకటించినట్లుగా 2012 నుంచి 2016 వరకు ఎంపిక చేసిన అవార్డులకు బహుమతి ప్రదానం ఉంటుంది. 2017 నుంచి 2024 వరకు ఒక్కో సంవత్సరానికి 4 అవార్డుల లెక్కన అందజేయడం జరుగుతుంది.

ఉత్తమ చిత్రం, ఉత్తమ ద్వితీయ చిత్రం సహా రెండు స్పెషల్‌ జ్యూరీ అవార్డులు ఇస్తాం. అన్ని కేటగిరిల్లో అవార్డులు ఇవ్వడం ఆచరణ సాధ్యం కాదు. 2025 నుంచి అన్ని విభాగాల్లోనూ అవార్డులను అందజేస్తాం. గత కొన్ని సంవత్సరాలుగా పెండింగ్‌లో ఉన్న ఎన్టీఆర్‌ అవార్డులు, రివార్డులను కూడా డిసెంబర్‌ 25నాటికి అందజేస్తాం’ అన్నారు. తెలుగు సినిమా ఎక్కడున్నా ఒక్కటే అని, తెలంగాణలో గద్దర్‌ అవార్డులు తీసుకున్న చిత్రాలు కూడా ఇక్కడ దరఖాస్తు చేసుకోవచ్చని భరత్‌ భూషణ్‌ పేర్కొన్నారు. 2025 సంవత్సరానికి సంబంధించి మంగళవారం నోటిఫికేషన్‌ ఇస్తున్నామని, అక్టోబర్‌ 12లోగా దరఖాస్తు చేసుకోవాలని ఆయన తెలిపారు.