ఒకటి కాదు.. రెండు!

ఒక వేలికి పెట్టుకుంటే మాత్రం ఒకటే ఉండాలని రూలేముంది? అలా అని, రెండూ వేరువేరు ఉంగరాలు కావాలన్న నియమమూ లేదు. అందుకే అమ్మాయిలూ అబ్బాయిల్లా విడివిడిగా ఉన్నా.. ప్రేమికుల మనసుల్లా ఒకటిగా పెనవేసుకునే అంగుళీకాలు వస్తున్నాయి.

ఒక వేలికి పెట్టుకుంటే మాత్రం ఒకటే ఉండాలని రూలేముంది? అలా అని, రెండూ వేరువేరు ఉంగరాలు కావాలన్న నియమమూ లేదు. అందుకే అమ్మాయిలూ అబ్బాయిల్లా విడివిడిగా ఉన్నా.. ప్రేమికుల మనసుల్లా ఒకటిగా పెనవేసుకునే అంగుళీకాలు వస్తున్నాయి. గొలుసులతో జతయ్యే ఈ జోడు ఉంగరాలు ‘లింక్డ్‌ చైన్‌ రింగ్స్‌’ పేరిట ఫ్యాషన్‌గా మారాయి!

ప్రేమ కానుకల్లో ముందువరుసలో నిలిచేది ఉంగరాలే. ‘నిను డైమండ్‌ రింగై రమ్మంది నా టెండర్‌ ఫింగరే’.. అంటూ పాటలూ అల్లేస్తున్నారు. అందుకే, అంగుళీకాల్లో ఎన్నడూలేనన్ని వెరైటీలను మన్నికగా తయారు చేస్తున్నారు డిజైనర్లు. ప్రియమైన వారి ముఖంలానే.. ఒక్కసారి చూస్తే వందసార్లు తలచుకునేంత ప్రత్యేకంగానూ రూపొందిస్తున్నారు.

ఈ జోడు ఉంగరాలను ‘లింక్డ్‌ చైన్‌ రింగ్స్‌’, ‘కనెక్టెడ్‌ చైన్‌ రింగ్స్‌’ అని పిలుస్తున్నారు. ఇందులో రెండు ఉంగరాలు సన్నని చైన్లతో అనుసంధానమై ఉంటాయి. రెండూ ఒకే డిజైన్‌తో వచ్చే వాటితో పాటు, ఒకదానికొకటి మ్యాచింగ్‌గా ఉంటూ వేరువేరు డిజైన్లతో తయారవుతున్నవీ ఉన్నాయి. సాదాగా ఉండేవి, రకరకాల రాళ్లు పొదిగినవే కాదు.. నాజూగ్గా, ఘనంగా కనిపించేవీ ఉన్నాయి. బంగారం, రోజ్‌గోల్డ్‌, స్టెర్లింగ్‌ సిల్వర్‌, ఫ్యాన్సీ రకాల్లోనూ వస్తున్నాయి. వివిధ సైజుల్లో దొరికే వీటిని అడ్జస్టబుల్‌ మాడల్స్‌లోనూ కొనుక్కోవచ్చు. ఒకే వేలికి రెండు ఉంగరాలు తొడుక్కోవచ్చు. ఉంగరం అంటే వేలి మొదట్లోనే ఎందుకుఉండాలి, చివరనా పెట్టుకోవచ్చు. నలుగురిలో ప్రత్యేకంగా కనిపించవచ్చు! ఏకాంతంలో ఉన్నప్పుడు మాత్రం ‘ఇవి రెండూ నువ్వూ నేనూ’ అనుకుంటూ మురిసిపోనూవచ్చు!