Legal opinion | ఇంటిపేరు మార్చుకోను!

కొన్ని నెలల క్రితమే నాకు పెండ్లయింది. చిన్నప్పటి నుంచీ నా పేరులో ఓ భాగమైన ఇంటిపేరును మార్చుకోవడం నాకు ఇష్టం లేదు. ఈ తంతు తప్పనిసరా? మార్చుకోకపోతే చట్టపరంగా ఇబ్బందులు ఎదురవుతాయా? అలాగే నేను, నా భర్త.. ఇద్దరమూ ఇంటిపేర్లను మార్చుకోవచ్చా? ఒకవేళ నేను నా పుట్టింటి ఇంటిపేరు మార్చుకోకపోతే, నా పిల్లలకు ఏ ఇంటిపేరు వస్తుంది? ఆ వచ్చిన ఇంటిపేరుతో భవిష్యత్‌లో పిల్లలకు ఏమైనా ఇబ్బందులు ఎదురవుతాయా? దయచేసి సలహా ఇవ్వండి.
ఓ సోదరి

జ : పెండ్లి తర్వాత ఇంటిపేరు మార్చుకోవాలని చట్టపరంగా ఎక్కడా లేదు. పాస్‌పోర్ట్‌ మొదలైన వాటిలో మీ ఇంటిపేరును అలాగే ఉంచుకుని, ‘స్పౌస్‌’ అన్న కాలమ్‌లో మీ భర్త పేరు పెట్టుకుంటే సరిపోతుంది. అదే పెండ్లికి సాక్ష్యంగా ఉంటుంది. అలాగే మీరు, మీ భర్త ఒకరి ఇంటి పేరును ఇంకొకరు పెట్టుకోవాలనుకున్నా ఏ ఇబ్బందీ ఉండదు. ఐడెంటిటీ ప్రూఫ్‌లలో సాధారణంగా పేరు ఎలా మారుస్తారో, అదే పద్ధతిలో ఇంటిపేరును మార్చుకోవచ్చు. అయితే, పిల్లలకు ఎవరి ఇంటిపేరు ఉండాలన్న దానిపై భార్యాభర్తలిద్దరూ కలిసి ఒక నిర్ణయం తీసుకోవాలి. కావాలంటే ఇద్దరి ఇంటిపేర్లనూ వాళ్లకు పెట్టుకోవచ్చు. పెండ్లి తర్వాత ఇంటి పేరును మార్చుకొని తీరాలన్న చట్టం మనదేశంలో లేదన్న విషయాన్ని ప్రతి ఆడబిడ్డా తెలుసుకోవాలి. ఈ విషయంలో ఎవరైనా బలవంతం చేస్తే, వాళ్లపై కేసు పెట్టొచ్చు.

మానసి చౌదరి
అడ్వకేట్‌
www.pinklegal.in