Visit:
న్యూఢిల్లీ, సెప్టెంబర్ 25: విద్యార్థి కార్యకర్త ఆకృతి చౌదరిపై ఉన్న జాతీయ భద్రతా చట్టం (ఎన్ఎస్ఏ) కేసులో సీఈసీ జ్ఞానేశ్ కుమార్ కుమార్తె, నోయిడా జిల్లా కలెక్టర్ మేధా రూపమ్ దాఖలు చేసిన పిటిషన్కు సుప్రీం కోర్టు ప్రత్యేక ప్రాధాన్యత ఇవ్వడంపై రాజ్యాంగ న్యాయవాదుల సంఘం (ఎల్ఏఎఫ్సీ) ఆందోళన వ్యక్తం చేసింది. ఈ మేరకు ప్రధాన న్యాయమూర్తి సూర్యకాంత్కు ఒక బహిరంగ లేఖ రాసింది. అమలులో ఉన్న రోస్టర్ ఉండగా, రూపమ్ పిటిషన్ను ప్రత్యేకంగా ఒక నిర్దిష్ట బెంచ్కు కేటాయించారని ఈ సంఘం ఆరోపించింది.
ఆమె సీఈసీ జ్ఞానేశ్ కుమార్ కుమార్తె కావడం కూడా ఈ విషయం అందరి దృష్టిని ఆకర్షిస్తున్నదని పేర్కొంది. ‘ఈ కేసును క్రమం తప్పించి విచారణ జాబితా చేయడం ప్రత్యేక ప్రాధాన్యతను సంతరించుకుంది. ఇది ఒక తప్పుడు సంప్రదాయానికి దారితీసే అవకాశం ఉంది’ అని ఆ లేఖలో తెలిపింది. 2026లో కార్మికుల వేతనాలు పెంచాలని డిమాండ్ చేస్తూ జరిగిన ఆందోళనలో ఢిల్లీకి చెందిన విద్యార్థిని ఆకృతి చౌదరి పాల్గొనగా, ఆమెను పోలీసులు అరెస్ట్ చేశారు.
తర్వాత ఆమెపై ఎన్ఎస్ఏ కింద నిర్బంధ ఉత్తర్వులను మేధా రూపమ్ జారీ చేశారు. దీనిపై ఆకృతి చౌదరి అలహాబాద్ హైకోర్టును ఆశ్రయించగా, ఆ ఉత్తర్వులను కొట్టివేసిన కోర్టు ఆమెను అక్రమంగా నిర్బంధించారని పేర్కొంటూ రూ.5లక్షల జరిమానా విధిస్తూ దానిని మేధా, ఇతర అధికారుల నుంచి వసూలు చేయాలని ఆదేశించింది. దీనిపై మేధా సుప్రీంను ఆశ్రయించారు.
