శివమెత్తి అలల పడగెత్తినదే..

పవర్‌ఫుల్‌ యాక్షన్‌ డ్రామాగా రూపొందిన ‘కేజీఎఫ్‌’ చిత్రం దేశవ్యాప్తంగా ప్రేక్షకాదరణ సొంతం చేసుకుంది. ఈ చిత్రానికి సీక్వెల్‌గా తెరకెక్కిస్తున్న ‘కేజీఎఫ్‌ చాప్టర్‌-2’ ఏప్రిల్‌ 14న ప్రపంచవ్యాప్తంగా విడుదలకానుంది. యష్‌ కథానాయకుడిగా ప్రశాంత్‌నీల్‌ దర్శకత్వంలో హోంబలే ఫిల్మ్స్‌ ఈ చిత్రాన్ని నిర్మిస్తున్నది. భారీ నిర్మాణ హంగులు, అత్యున్నత సాంకేతిక విలువలతో తెరకెక్కిస్తున్న ఈ సీక్వెల్‌ కోసం సినీ ప్రేమికులు ఆసక్తిగా ఎదురుచూస్తున్నారు. విడుదల తేదీ సమీపిస్తుండటంతో ప్రచార కార్యక్రమాల్ని ముమ్మరం చేశారు. తొలిగీతం ‘తుఫాన్‌’ను సోమవారం విడుదల చేశారు. కథానాయకుడి పాత్ర స్వభావాన్ని, ధీరత్వాన్ని వర్ణిస్తూ ఈ పాట సాగింది. ‘తుఫాన్‌..తుఫాన్‌..ఎలుగెత్తి ఎగసి తొడగొట్టినదే..శివమెత్తి అలల పడగెత్తినదే’ అంటూ రోమాంచితమైన విజువల్స్‌తో పాట ఆకట్టుకుంది. ఈ గీతానికి రవి స్వరాల్ని అందించారు.