కథ కంచికి మనం ఇంటికి

ఆదిత్‌ అరుణ్‌, పూజిత పొన్నాడ జంటగా నటిస్తున్న చిత్రం ‘కథ కంచికి మనం ఇంటికి’. చాణక్య చిన్న దర్శకత్వంలో మోనిష్‌ పత్తిపాటి నిర్మిస్తున్నారు. ఈ నెల 8న విడుదల కానుంది. ఈ సందర్భంగా మంగళవారం ఏర్పాటు చేసిన సమావేశంలో దర్శకుడు చిత్ర విశేషాలు తెలియజేస్తూ ‘కామెడీ జోనర్‌లో చాలా కొత్త కథ ఇది. ఆద్యంతం వినోదప్రధానంగా ఆకట్టుకుంటుంది. ఓ జంట ప్రేమ ప్రయాణం అనుకోని సంఘటనల వల్ల అనూహ్యమైన మలుపులు తీసుకుంటుంది. అదేమిటన్నదే ఆసక్తికరంగా ఉంటుంది. వినోదం, హారర్‌ అంశాలతో ప్రేక్షకుల్ని మెప్పిస్తుంది’ అన్నారు. ‘హారర్‌ జోనర్‌లో ఓ విభిన్న కథా చిత్రమిది. ఆర్జే హేమంత్‌, గెటప్‌ శ్రీను మధ్య నడిచే కామెడీ ప్రధానాకర్షణగా నిలుస్తుంది. థియేటర్లలో ఈ సినిమాను విడుదల చేస్తున్నాం’ అని నిర్మాత తెలిపారు. మహేష్‌ మంజ్రేకర్‌, సప్తగిరి, వినోద్‌కుమార్‌ తదితరులు నటిస్తున్న ఈ చిత్రానికి కెమెరా: వై.యస్‌.కృష్ణ, సంగీతం: భీమ్స్‌ సిసిరోలియో, సంభాషణలు: శ్రీనివాస్‌ తేజ, దర్శకత్వం: చాణక్య చిన్న.