ఇటీవల మలయాళంలో విడుదలైన ప్రేమకథా చిత్రం ‘హృదయం’ భారీ విజయాన్ని దక్కించుకుంది. మోహన్లాల్ తనయుడు ప్రణవ్ మోహన్లాల్, కల్యాణి ప్రియదర్శన్ జంటగా నటించిన ఈ చిత్రం హృద్యమైన ప్రణయగాథగా ప్రేక్షకుల్ని ఆకట్టుకుంది. కాలేజీ రోజుల నుంచి వైవాహిక బంధం వరకు ఓ యువకుడి భావోద్వేగభరిత జీవిత ప్రయాణానికి అందమైన దృశ్యరూపంగా నిలిచింది. తాజాగా ఈ సినిమా హిందీతో పాటు దక్షిణాది భాషల రీమేక్ హక్కుల్ని ప్రముఖ దర్శకనిర్మాత కరణ్జోహార్ సొంతం చేసుకున్నారు. ధర్మ ప్రొడక్షన్స్, ఫాక్స్స్టార్ స్టూడియోస్ పతాకాలపై ఆయన ఈ సినిమాను హిందీ, తమిళ, తెలుగు భాషల్లో పునర్నిర్మించబోతున్నారు. ఈ విషయాన్ని ఆయన ట్విట్టర్ ద్వారా తెలియజేశారు. ‘న్యూ ఏజ్ లవ్స్టోరీ ‘హృదయం’ రీమేక్ హక్కుల్ని పొందడం గౌరవంగా భావిస్తున్నా. ఈ సినిమాను హిందీ, తెలుగు, తమిళ భాషల్లో రీమేక్ చేయబోతున్నాం’ అని కరణ్జోహార్ పేర్కొన్నారు. ప్రస్తుతం ఆయన రణ్వీర్సింగ్, ఆలియాభట్ నాయకానాయికలుగా ‘రాకీ ఔర్ రాణికీ ప్రేమ్ కహానీ’ చిత్రానికి దర్శకత్వం వహిస్తున్నారు.