గర్భదారణ సమయంలో యోగాసనాలు వేయొచ్చా.. ? వజ్ర త్రికోణాసనం ఎలా వేయాలి ?

గర్భధారణ సమయంలో యోగాసనాలు సాధన చేయడం వల్ల కాన్పు తర్వాత శరీరంలో వచ్చే ప్రతికూల మార్పులకు అడ్డుకట్ట వేయవచ్చు. పరిపూర్ణ ఆరోగ్యంగానూ ఉండవచ్చు. వెన్నెముకకు వెన్నుదన్నుగా నిలిచే వజ్ర త్రికోణాసనం ఎలా వేయాలంటే..

• ముందుగా వజ్రాసన స్థితిలో కూర్చోవాలి. అంటే, రెండు కాళ్లను వెనక్కి ముడుచుకొని, పాదాలు పిరుదుల కిందికి తీసుకోవాలి. శరీరాన్ని కాస్త పైకెత్తాలి. వెన్నెముక నిటారుగా ఉండేలా చూసుకోవాలి.
• ఇప్పుడు నిదానంగా మోకాళ్లపై పైకి లేచి శ్వాస తీసుకోవాలి.
• ఊపిరి వదులుతూ కుడికాలిని చిత్రంలో చూపినట్టు పక్కకు జరపాలి. కుడిచేతిని కుడి మోకాలిపై ఉంచాలి. ఎడమ చేతిని నిటారుగా పైకెత్తాలి. మోచేయి ఎడమవైపు చూసేలా ఉండాలి. ముఖాన్ని కాస్త పైకెత్తి ఎడమ అరచేతిపై దృష్టి నిలపాలి.
• ఈ ఆసన స్థితిలో ఐదారుసార్లు నిదానంగా శ్వాసక్రియ కొనసాగించాలి.
• తర్వాత మళ్లీ వజ్రాసన స్థితికి వచ్చి రెండోవైపు కూడా ఇదే విధంగా ఆసనం కొనసాగించాలి.

ప్రయోజనాలు: వజ్ర త్రికోణాసనంతో కటి ఎముకలు బలంగా తయారవుతాయి. మూత్రపిండాలకు రక్త ప్రసరణ మెరుగవుతుంది. వెన్నెముక దృఢత్వం పెరుగుతుంది. సయాటికా నొప్పి నుంచి ఉపశమనం లభిస్తుంది. కానీ, డాక్టర్‌ సలహా తీసుకున్న తర్వాతే ఈ ఆసనం వేయాలి. మధ్యలో ఇబ్బంది అనిపిస్తే ఆపేయాలి.

అనితా అత్యాల
ప్రెగ్నెన్సీ యోగా నిపుణురాలు
6309800109