Visit:
హైదరాబాద్, సెప్టెంబర్ 27 (నమస్తే తెలంగాణ): ఖైరతాబాద్ అసెంబ్లీ నియోజకవర్గ ఉప ఎన్నికలో మరోసారి అదృష్టాన్ని పరీక్షించుకునేందుకు బీజేపీ సిద్ధమవుతున్నది. 2023 అసెంబ్లీ ఎన్నికల్లో ఆ పార్టీ ఇక్కడ మూడో స్థానానికి పరిమితమైంది. అప్పట్లో బీఆర్ఎస్ అభ్యర్థిగా పోటీచేసిన దానం నాగేందర్ 67,368 (43.48 శాతం) ఓట్లు కైవసం చేసుకుని ఘనవిజయం సాధించగా.. కాంగ్రెస్ అభ్యర్థి పీ విజయారెడ్డి 45,358 (29.28 శాతం) ఓట్లతో రెండో స్థానంలో నిలిచారు. బీజేపీ అభ్యర్థి చింతల రామచంద్రారెడ్డికి 38,094 (24.59 శాతం) ఓట్లు మాత్రమే లభించాయి.
దీంతో బీఆర్ఎస్ కంటే ఏకంగా 29,274 ఓట్ల భారీ తేడాతో వెనుకబడిన బీజేపీ క్షేత్రస్థాయిలో ఇప్పటికీ బలహీనంగానే ఉన్నట్టు స్పష్టమవుతున్నది. అయినప్పటికీ గతంలో దుబ్బాక, హుజూరాబాద్ ఉప ఎన్నికల్లో సంచలన విజయాలు సాధించినట్టుగానే ఇప్పుడు ఖైరతాబాద్లోనూ పాగా వేస్తామని బీజేపీ నేతలు చెప్తున్నారు. కానీ, కేవలం ఇలాంటి వ్యూహాత్మక ప్రకటనలు లేదా సోషల్ మీడియా హైప్తో బీజేపీ గెలువడం సాధ్యం కాదని రాజకీయ విశ్లేషకులు స్పష్టం చేస్తున్నారు.
