Asalem Jarigindi | ఊహించని విజయమిది

‘కష్టపడి సాధించిన విజయంలో ఎంతో సంతృప్తి ఉంటుంది. అలాంటి సక్సెస్‌ను మాకు అందించిన చిత్రమిది’ అని అన్నారు శ్రీరామ్‌. ఆయన హీరోగా నటించిన చిత్రం ‘అసలేం జరిగింది’. ఎన్వీఆర్‌ దర్శకుడు. ఎక్సోడస్‌ మీడియా పతాకంపై మైనేని నీలిమా చౌదరి, కింగ్‌ జాన్సన్‌ కొయ్యడ నిర్మించారు. సంచితా పదుకొనే కథానాయిక. ఇటీవల ఈ చిత్రం ప్రేక్షకుల ముందుకొచ్చింది. మంగళవారం హైదరాబాద్‌లో చిత్రబృందం విజయోత్సవ వేడుకను నిర్వహించింది. హీరో శ్రీరామ్‌ మాట్లాడుతూ ‘తెలుగులో సహాయ పాత్రలు ఎక్కువగా వరిస్తున్నాయి. అలాంటి క్యారెక్టర్స్‌కు దూరంగా ఉంటూ సోలో హీరోగా మాత్రమే నటించాలని నిర్ణయించుకున్నా. మంచి అవకాశం కోసం ఎదురుచూస్తున్న తరుణంలో దర్శకనిర్మాతలు చెప్పిన కథ నచ్చింది. షూటింగ్‌ మొత్తం సరదాగా సాగింది. పల్లెటూరికి విహారయాత్రకు వెళ్లిన అనుభూతి కలిగింది’ అన్నారు. నిర్మాత కింగ్‌ జాన్సన్‌ కొయ్యడ మాట్లాడుతూ ‘మా తొలి సినిమా ఇది. పరిమిత బడ్జెట్‌లో సినిమాను తెరకెక్కించాం. తెలుగు ప్రేక్షకుల నుంచి చక్కటి స్పందన లభిస్తున్నది. వసూళ్లు బాగున్నాయి. ఊహించని విజయమిది’ అని తెలిపారు. దర్శకుడు ఎన్వీఆర్‌ మాట్లాడుతూ ‘ఈ సక్సెస్‌ క్రెడిట్‌ నిర్మాత జాన్సన్‌కు దక్కుతుంది. సినిమా హిట్‌ అవుతుందని నమ్మిన తొలి వ్యక్తి హీరో శ్రీరామ్‌. నన్ను, నా కథను నమ్మి ప్రోత్సహించారు’ అని చెప్పారు.