Rajinikanth: ‘పెద్ద‌న్న‌’గా రాబోతున్న ర‌జ‌నీకాంత్‌..!

సూప‌ర్ స్టార్ ర‌జ‌నీకాంత్ గ‌త కొద్ది రోజులుగా వ‌రుస ఫ్లాపుల‌తో స‌త‌మ‌త‌మ‌వుతున్న విష‌యం తెలిసిందే.తాజాగా ఆయ‌న శివ ద‌ర్శ‌క‌త్వంలో అన్నాత్తె అనే సినిమా చేశాడు. గురువారం చిత్ర టీజ‌ర్ విడుద‌ల కాగా, ప్రేక్ష‌కుల‌ని ఎంత‌గానో అల‌రించింది. టీజ‌ర్ ప‌క్కా క‌మ‌ర్షియ‌ల్ కోణంలో ర‌జ‌నీకాంత్ హీరోయిజాన్ని ఎలివేట్ చేసింది. రజనీని పవర్‌ఫుల్‌ రోల్‌లో దర్శకుడు శివ చూపించబోతున్నారని తాజా టీజర్ ని చూస్తుంటే స్పష్టమవుతుంది.

అన్నాత్తె చిత్రం తెలుగులోను విడుద‌ల కానుండ‌గా, పెద్ద‌న్న అనే టైటిల్‌తో ఇక్క‌డ విడుద‌ల చేయనున్న‌ట్టు స్ప‌ష్టం చేశారు. అన్నాత్తే అంటే తమిళంలో అన్నయ్య అనే అర్థం వస్తుంది. అదే అర్థంతో తెలుగులో ఈ చిత్రాన్నిపెద్ద‌న్న‌గా రిలీజ్‌ చేయబోతుండటం విశేషం. న‌వంబ‌ర్ 4న చిత్రాన్ని విడుద‌ల చేయ‌నుండ‌గా, పెద్దన్న రాకతో ఊహించని విధంగా దీపావళి బాక్సాఫీస్ బరిలో పోటీ పెరిగిపోయింది.

ఈసారి దీపావళికి పెద్ద సినిమా లేదనే లోటును పెద్దన్న తీర్చాడు. అయితే అదే సమయంలో వరుడు కావలెను, రొమాంటిక్, మంచి రోజులు వచ్చాయి లాంటి సినిమాలు రిలీజ్ కానుండ‌గా, పెద్ద‌న్న‌తో ఈ సినిమాలు పోటీ ప‌డి నిలుస్తాయా అన్న‌ది ఆస‌క్తిక‌రంగా మారింది. పెద్దన్న సినిమాను నారాయణ్ దాస్ నారంగ్, సురేష్ బాబు కలిసి తీసుకున్నారు. కాబట్టి ఆంధ్రప్రదేశ్, తెలంగాణలో ఈ సినిమా భారీ ఎత్తున రిలీజ్ అవ్వడం పక్కా అని తేలిపోయింది.