ఈ సినిమా నాకు ఎంతో ప్రత్యేకమనది: రకుల్‌ప్రీత్‌సింగ్‌

అజయ్‌దేవ్‌గణ్‌ దర్శకత్వంలో రూపొందుతున్న ‘మేడే’ సినిమా టైటిల్‌ మారింది. ఈ చిత్రానికి ‘రన్‌వే 34’ అనే టైటిల్‌ను నిర్ణయించినట్లు ఆయన ప్రకటించారు. అజయ్‌దేవ్‌గణ్‌తో పాటు అమితాబ్‌బచ్చన్‌, రకుల్‌ప్రీత్‌సింగ్‌ ప్రధాన పాత్రల్లో నటిస్తున్న ఈ థ్రిల్లర్‌ చిత్రం ఏప్రిల్‌ 29న ప్రేక్షకులముందుకురానుంది. సోమవారం ముగ్గురి తారల ఫస్ట్‌లుక్స్‌ను విడుదల చేశారు. ఈ సినిమా తన కెరీర్‌లో ఎంతో ప్రత్యేకమని రకుల్‌ప్రీత్‌సింగ్‌ ఆనందం వ్యక్తం చేసింది.

ఈ సందర్భంగా ఆమె సోషల్‌మీడియాలో ఓ పోస్ట్‌ చేసింది. ‘ఆద్యంతం ఉత్కంఠభరితంగా సాగే థ్రిల్లర్‌ చిత్రమిది. నిజ జీవిత సంఘటనల స్ఫూర్తితో తెరకెక్కించాం. మనమే సర్వశక్తిమంతులం అని విర్రవీగే తరుణంలో ఒక్కసారిగా పాతాళంలోకి జారిపోయినట్లు నిస్పృహ ఆవహించవొచ్చు. మనలోని భావోద్వేగాల తుఫాను ఉక్కిరిబిక్కిరి చేయొచ్చు. ఆకాశవీధిలో అనుక్షణం ఉత్కంఠతో కూడిన ప్రయాణాన్ని ఆస్వాదించేందుకు సిద్ధంకండి’ అంటూ సినిమా గురించి చెప్పింది రకుల్‌ప్రీత్‌సింగ్‌.

గగనతలంలో ప్రమాదపుటంచుల వరకు వెళ్లిన విమానాన్ని రక్షించే పైలెట్ల నేపథ్య కథతో ఈ సినిమాను తెరకెక్కించినట్లు సమాచారం. ఇందులో అజయ్‌దేవ్‌గణ్‌, రకుల్‌ప్రీత్‌సింగ్‌ పైలెట్స్‌గా నటిస్తున్నారు. గతంలో అజయ్‌దేవ్‌గణ్‌ ‘యు మీ ఔర్‌ హమ్‌’ ‘శివాయ్‌’ చిత్రాలకు దర్శకత్వం వహించిన విషయం తెలిసిందే.