ఏబీవీపీ ఒత్తిడితో ముస్లిం ప్రొఫెసర్‌ రాజీనామా!

విద్యార్థుల హాజరుకు సంబంధించిన వివాదం అఖిల భారతీయ విద్యార్థి పరిషత్‌(ఏబీవీపీ) ఒత్తిడితో కోల్‌కతాలోని సురేంద్రనాథ్‌ కళాశాలకు చెందిన ఒక ముస్లిం ప్రొఫెసర్‌ బలవంతపు రాజీనామాకు దారి తీసింది.

• హాజరుపై కఠినంగా ఉన్నందుకు ‘శిక్ష’

కోల్‌కతా : విద్యార్థుల హాజరుకు సంబంధించిన వివాదం అఖిల భారతీయ విద్యార్థి పరిషత్‌(ఏబీవీపీ) ఒత్తిడితో కోల్‌కతాలోని సురేంద్రనాథ్‌ కళాశాలకు చెందిన ఒక ముస్లిం ప్రొఫెసర్‌ బలవంతపు రాజీనామాకు దారి తీసింది. ఈ నెల 11న ఏబీవీపీ సభ్యులు కొందరు వైస్‌ ప్రిన్సిపాల్‌ మొహమ్మదీ తరన్నుమ్‌ ఆఫీసును రోజంతా ముట్టడించి ఆమె రాజీనామా లేఖను తామే తయారుచేసి దానిపై ఆమెతో బలవంతంగా సంతకం పెట్టించారు.

పోలీసులు ఆమెను సురక్షితంగా బయటకు పంపిన తర్వాత ఏబీవీపీ సభ్యులు ఆమె కార్యాలయాన్ని శుద్ధి చేస్తున్నట్టుగా అగర్‌ బత్తీలు వెలిగించి, గంగాజలాన్ని చల్లారు. కళాశాల వైస్‌ ప్రిన్సిపాల్‌గా తరన్నుమ్‌ వ్యవహరించారు. సెమిస్టర్‌ పరీక్షల కోసం విద్యార్థులకు 65 శాతం హాజరు తప్పనిసరి. ఈ నెల 28న జరగనున్న పరీక్షలకు హాజరు నిబంధన కచ్చితంగా వర్తిస్తుందని ఆమె స్పష్టం చేశారు. దీంతో ఏబీవీపీ ఆమె రాజీనామాకు ఒత్తిడి తెచ్చినట్టు భావిస్తున్నారు.