చేతులు, కాళ్లతో క్యూబిక్‌ గేమ్‌.. గిన్నిస్‌లోకి ఎనిమిదేండ్ల బాలుడు

బెంగళూరు : సాధారణంగా క్యూబిక్‌ గేమ్‌ ఆడాలంటేనే పిల్లలు మొదలు పెద్దవాళ్ల దాకా చాలా మంది భయపడుతుంటారు. తమతోటి కాదంటూ పెదవి విరుస్తుంటారు. కానీ, ఈ గేమ్‌ను పూర్తిచేయడంలో చాలా మంది వివిధ రకాలుగా ఆరితేరి ప్రపంచాన్ని విస్తుపరుస్తున్నారు. ఇటీవల కండ్లకు గంతలు కట్టుకుని రెండు చేతులతో రెండు క్యూబిక్స్‌ సరిచేసి సచిన్‌ను ఓ బాలుడు ఆశ్చర్యపరిచాడు. అలాంటి మరో చిచ్చరపిడుగు తానేం తక్కువ తినలేదంటూ.. చేతులతోపాటు కాళ్లతో కూడా క్యూబిక్‌ గేమ్‌ ఆడి కొత్త ప్రపంచ రికార్డును నెలకొల్పాడు.
బెంగళూరుకు చెందిన అథర్వ ఆర్‌ భట్‌ అనే ఎనిమిదేండ్ల కుర్రాడు.. అలవోకగా ఒకేసారి మూడు క్యూబిక్స్‌ సరిచేసి ఔరా అనిపించాడు. అదికూడా రెండు చేతుల్లో రెండు, కాళ్లతో ఒక క్యూబిక్‌ను ఒకేసారి సరిచేసి గిన్నిస్‌ వరల్డ్‌ రికార్డ్స్‌లో స్థానం సంపాదించుకున్నాడు. కేవలం రెండు నిమిషాల వ్యవధిలోనే ఈ ఫీట్‌ చేసిన బుడతడిగా నిలిచాడు. ఈ అద్భుత ఫీట్‌ వీడియోను గిన్నిస్‌ వరల్డ్‌ రికార్డ్స్‌ విడుదల చేసింది. రెండు చేతులు, రెండు కాళ్ల సాయంతో మూడు క్యూబిక్స్ సరిచేయడంలో వేగంగా పూర్తిచేసిన రికార్డును సొంతం చేసుకున్నాడని గిన్నిస్‌ వరల్డ్ రికార్డ్స్‌ వెల్లడించింది. గత ఏడాది డిసెంబర్‌ 9 న బెంగళూరులోని లిటిల్ ఫ్లవర్‌ పబ్లిక్‌ స్కూల్‌లో 1 నిమిషం 29.97 సెకండ్లలో ఈ ఫీట్‌ పూర్తిచేసి గిన్నిస్‌ రికార్డుల్లోకి ఎక్కినట్లు తెలిపింది.
ఇటీవల కండ్లకు గంతలు కట్టుకుని తనిష్క సుజిత్‌ అనే 13 ఏండ్ల బాలిక అత్యంత వేగంగా క్యూబిక్స్‌ సరిచేసింది. అలాగే చెన్నైకి చెందిన ఇలయరాం శేఖర్‌ అనే 25 ఏండ్ల యువకుడు నీటి అడుగున శ్వాస బిగబట్టి కేవలం రెండు నిమిషాల్లో ఆరు క్యూబిక్స్‌ సాల్వ్‌ చేసి గిన్నిస్‌ బుక్కులోకి ఎక్కాడు.