Visit:
న్యూఢిల్లీ : ‘సర్‌’ కింద అప్పీళ్లను విచారించేందుకు భారత ఎన్నికల సంఘం ఏర్పాటు చేసిన ఆన్‌లైన్‌ వ్యవస్థపై పశ్చిమ బెంగాల్‌లోని 12కు పైగా అప్పీలేట్‌ ట్రిబ్యునళ్ల న్యాయమూర్తులు ఆందోళన వ్యక్తం చేశారు. ఆగస్టు 11న జరిగిన ఒక సమావేశంలో ఈ సమస్యను ప్రముఖంగా ప్రస్తావించారని, నోటీసులు జారీ చేయడం, పత్రాలను అప్‌లోడ్‌ చేయడంలో ఇబ్బందులు కూడా ఇందులో ఉన్నాయని ‘ఇండియన్‌ ఎక్స్‌ప్రెస్‌’ కొత్త నివేదిక తెలిపింది. సర్‌లో తొలగించిన ఓటర్ల అప్పీళ్లను పరిష్కరించేందుకు సుప్రీంకోర్టు ఆదేశాల మేరకు ఈ ట్రిబ్యునళ్లను ఏర్పాటు చేశారు. ఇండియన్‌ ఎక్స్‌ప్రెస్‌ నివేదిక ప్రకారం అప్పీళ్లలో పాల్గొన్న పార్టీలకు నేరుగా నోటీసులు జారీ చేసే వ్యవస్థ ఈసీఐ పోర్టల్‌లో లేదని న్యాయమూర్తులు ఫిర్యాదు చేశారు. మే నెలలో కొన్ని ట్రిబ్యునళ్లు ఆమోదించిన నోటీస్‌ ఫార్మాట్‌ను కూడా అమలు చేయలేదు.
అప్పీళ్లు చేసిన ఓటర్ల నుంచి అదనపు పత్రాలను అప్‌లోడ్‌ చేయడం, వర్చువల్‌ విచారణలు నిర్వహించడం, తొలగించిన ఓటరును పునరుద్ధరించడం వారికి సాధ్యపడలేదు.తమ పేర్లను ఎందుకు తొలగించారో, లేదా చేర్చారో తెలుసుకునేందుకు ట్రిబ్యునల్‌ ధ్రువీకరించిన కాపీలను అప్పీలుదారులు పోర్టల్‌ నుంచి డౌన్‌లోడ్‌ చేసుకోవడానికి వీలుపడటం లేదు. జిల్లా అధికారులకు భౌతికంగా సమర్పించిన అప్పీళ్లను డిజిటిలైజ్‌ చేయడానికి, పర్యవేక్షించడానికి సరైన వ్యవస్థ లేదని న్యాయమూర్తులు ఆందోళన వ్యక్తం చేశారు. ఓటర్ల అప్పీళ్లు సరైన ప్రదేశానికి చేరకపోతే పౌరులకు తీవ్ర అన్యాయం జరుగుతుందని వారు హెచ్చరించారు. కాగా, బెంగాల్‌లో తార్కిక వ్యత్యాసాలు ఉన్న, మ్యాప్‌లో లేవని గుర్తించిన 60 లక్షల మంది ఓటర్లపై న్యాయ సమీక్ష జరిగింది.
