Supreme Court: చ‌దువుకున్న‌వాళ్లు డిజిట‌ల్ అరెస్టు ఎలా అవుతున్నారు.. సుప్రీంకోర్టు షాక్‌

Supreme Court: డిజిట‌ల్ అరెస్టు కేసులు పెరుగుతున్న అంశంపై సుప్రీంకోర్టు ఆందోళ‌న వ్య‌క్తం చేసింది.చ‌దువుకున్న‌వారు మొబైల్ ఫోన్ల‌లో ఎలా డిజిట‌ల్ అరెస్టు అవుతున్నార‌ని కోర్టు షాక్ వ్య‌క్తం చేసింది.

న్యూఢిల్లీ: డిజిట‌ల్ అరెస్టు కేసులు పెరుగుతున్న అంశంపై సుప్రీంకోర్టు(Supreme Court) ఆందోళ‌న వ్య‌క్తం చేసింది.చ‌దువుకున్న‌వారు మొబైల్ ఫోన్ల‌లో ఎలా డిజిట‌ల్ అరెస్టు అవుతున్నార‌ని కోర్టు షాక్ వ్య‌క్తం చేసింది. ప్ర‌జ‌ల్లో అవ‌గాహ‌న క‌ల్పించినా ఎలా ఇలాంటి నేరాలు జ‌రుగుతున్నాయ‌ని అత్యున్న‌త న్యాయ‌స్థానం విస్మ‌యానికి గురైంది. డిజిట‌ల్ అరెస్టుల‌పై సుమోటో కేసులో సుప్రీం వాద‌న‌లు విన్న‌ది. ఈ నేప‌థ్యంలో సీజేఐ సూర్య‌కాంత్ స్పందిస్తూ.. అస‌లు ఈ బాధితుల‌తో ఏం జ‌రుగుతోంది, ఎలా బాధితులు ట్రాప్ అవుతున్నార‌ని ఆయ‌న వాద‌న‌ల స‌మ‌యంలో ఆందోళ‌న వ్య‌క్తం చేశారు. చాలా బేసిక్ విష‌యం కూడా వాళ్ల‌కు అర్థం కాదా, ఫోన్‌లో భ‌య‌పెట్టి డిజిట‌ల్ అరెస్టు చేస్తారా అని ఆయ‌న అన్నారు.

ప్ర‌జ‌ల్లో ఏదో పొర‌పాటు జ‌రుగుతోంద‌ని, అదేంటో దేవుడికే తెలియాల‌ని, ప్ర‌జాస్వామ్య దేశంలో ఫోన్ ద్వారా అరెస్టు అవుతున్నారంటే మీరేంటో ఆలోచిస్తున్నారా అని సీజేఐ అన్నారు. డిజిట‌ల్ ఫ్రాడ్ కేసుల్లో బ్యాంకులు బాధ్య‌త తీసుకోవాల‌ని, బాధితుల‌కు న‌ష్ట‌ప‌రిహారాన్ని చెల్లించాల‌న్నారు. క‌స్ట‌మ‌ర్ల‌కు బ్యాంకులు ఓ ర‌క్ష‌ణ‌క‌వ‌చంలా ఉండాల‌న్నారు. ప‌ద‌వీవిర‌మ‌ణ చేసిన వ్య‌క్తి బ్యాంక్ అకౌంట్ నుంచి భారీ మొత్తంలో విత్‌డ్రా జ‌రుగుతుంటే, ఎందుకు బ్యాంకులు జోక్యం చేసుకోవ‌డం లేద‌ని సీజేఐ నేతృత్వంలోని బెంచ్ ప్ర‌శ్నించింది.

అయితే అనుమానిత లావాదేవీల‌ను బ్యాంకులు గుర్తిస్తున్నాయ‌ని, నేరాల జ‌ర‌గ‌కుండా చ‌ర్య‌లు తీసుకుంటున్నాయ‌ని అటార్నీ జ‌న‌ర‌ల్ ఆర్ వెంక‌ట‌ర‌మ‌ణి కోర్టులో తెలిపారు. ప్ర‌జ‌ల‌తోనే ఏదో త‌ప్పు ఉంద‌ని, దేవుడికే ఆ విష‌యం తెలియాల‌ని, మీకు మీరు బాధితుల‌వుతున్నార‌ని, విద్యావంతులు ఫ్రాడ్‌కు గుర‌వుతున్నార‌ని తెలుసుకోవ‌డం ఆందోళ‌న క‌లిగిస్తోంద‌ని సీజేఐ అన్నారు.