UP polls | యూపీ ఎన్నిక‌లు.. స‌మాజ్‌వాదీ పార్టీతో కాంగ్రెస్ పొత్తు.. 200 సీట్లు కావాలంటూ డిమాండ్

UP polls : స‌మాజ్‌వాదీ పార్టీ (ఎస్పీ)తో కాంగ్రెస్ పార్టీ పొత్తు కోసం ప్ర‌య‌త్నిస్తుంది. అయితే, త‌మ‌కు 200 అసెంబ్లీ సీట్లు కావాల‌ని ఎస్పీని కాంగ్రెస్ పార్టీ డిమాండ్ చేస్తున్న‌ట్లు తెలుస్తోంది. యూపీలో మొత్తం 403 అసెంబ్లీ సీట్లున్నాయి.

UP polls : వ‌చ్చే ఏడాది ఉత్త‌ర ప్ర‌దేశ్‌లో అసెంబ్లీ ఎన్నిక‌లు జ‌ర‌గ‌బోతున్నాయి. ఈ నేప‌థ్యంలో ఇప్ప‌టినుంచే ప్ర‌తిప‌క్షాలు పొత్తుల కోసం ప్ర‌య‌త్నిస్తున్నాయి. బ‌లంగా ఉన్న అధికార పార్టీ బీజేపీని ఎదుర్కోవాలంటూ కూట‌మి క‌ట్ట‌డం త‌ప్ప‌ద‌ని ప్ర‌తిప‌క్షాలు భావిస్తున్నాయి. ఈ నేప‌థ్యంలో స‌మాజ్‌వాదీ పార్టీ (ఎస్పీ)తో కాంగ్రెస్ పార్టీ పొత్తు కోసం ప్ర‌య‌త్నిస్తుంది. అయితే, త‌మ‌కు 200 అసెంబ్లీ సీట్లు కావాల‌ని ఎస్పీని కాంగ్రెస్ పార్టీ డిమాండ్ చేస్తున్న‌ట్లు తెలుస్తోంది.

యూపీలో మొత్తం 403 అసెంబ్లీ సీట్లున్నాయి. అందులో స‌గం సీట్లు కావాల‌ని కాంగ్రెస్ అడుగుతోంది. ఈ విష‌యంపై ఇరు పార్టీల మ‌ధ్య చ‌ర్చ‌లు జ‌రుగుతున్నాయి. కాంగ్రెస్ పార్టీకి 50 సీట్లు మాత్ర‌మే ఇచ్చేందుకు గ‌తంలో ఎస్పీ అంగీక‌రించింది. ఆ స‌మ‌యంలో 150 సీట్లు కావాల‌ని కాంగ్రెస్ అడిగింది. కానీ, దీనికి ఎస్పీ నిరాక‌రించింది. 50 సీట్లు ఇవ్వ‌డ‌మే ఎక్కువ అన్న‌ట్లు వ్యాఖ్యానించింది. దీంతో కాంగ్రెస్ పార్టీ 50 సీట్లకు స‌ర్దుకుంటుందేమో అనుకున్నారు అంతా. కానీ, విచిత్రంగా 200 సీట్లు డిమాండ్ చేస్తోంది. ఇటీవ‌లే ఉత్త‌ర ప్ర‌దేశ్ కాంగ్రెస్ పార్టీ నేత‌ల‌తో ఆ పార్టీ అగ్ర‌నేత ప్రియాంకా గాంధీ మాట్లాడారు.

సీట్ల స‌ర్దుబాటుపై నేత‌ల‌తో చ‌ర్చించారు. 150 సీట్లపై చ‌ర్చిస్తారు అనుకుంటే.. ఏకంగా 200 సీట్లు కావాల‌ని ఆ పార్టీ డిమాండ్ చేస్తోంది. ఈ అంశంపై అధికారిక ప్ర‌క‌ట‌న లేదు. ఇక‌, కాంగ్రెస్ తాజా ప్ర‌తిపాద‌న‌పై ఎస్పీ అధినేత అఖిలేష్ యాదవ్ ఎలా స్పందిస్తారో చూడాలి. ఆయ‌న గ‌తంలో త‌మ పార్టీ 350 సీట్ల‌లో, కాంగ్రెస్ 53 సీట్ల‌లో పోటీ చేస్తుంద‌ని తెలిపారు. యూపీలో వ‌చ్చే ఏడాది అసెంబ్లీ ఎన్నిక‌లు జ‌రుగుతాయి. అక్క‌డ బీజేపీ (ఆదిత్య‌నాథ్ యోగి) ఆధ్వ‌ర్యంలోని ప్ర‌భుత్వం అధికారంలో ఉన్న సంగ‌తి తెలిసిందే.