లక్నో: అనుమానం పెనుభూతమనే సామెతను మనం తరచూ వింటుంటాం. ఏదైనా విషయంలో ఒకరిపై అనుమానం వచ్చిందంటే వారిని, వారికి కావలసిన వారిని ఏం చేయడానికైనా వెనుకాడరు. ఇలాంటిదే ఉత్తరప్రదేశ్లోని షహ్జాన్పూర్ జిల్లా తానా సదర్ బజార్లో చోటుచేసుకున్నది. తాను ప్రేమగా పెంచుకుంటున్న పిల్లిని పక్కింటాయన ఎత్తుకెళ్లాడనే అనుమానంతో.. అతనికి చెందిన 30 పావురాలను చంపేశాడు.
తానా సదర్ బజార్కు చెందిన అబిద్, వారిస్ అలీ ఇరుగురుపొరుగు. అబిద్ ఓ పిల్లిని పెంచుకుంటున్నాడు. పక్షి ప్రేమికుడైన పక్కింట్లో ఉండే వారిస్ అలీ.. 78 పావురాలను సాదుకుంటున్నాడు. అయితే ఓ రోజు అకస్మాత్తుగా పిల్లి కనిపించకుండా పోయింది. దీంతో వారిస్ అలీయే తన పిల్లిని మాయం చేశాడని అతనిపై అనుమానం పెంచుకున్నాడు అబిద్. దీంతో మరో ముగ్గురితో కలిసి విషం కలిపిన పదార్ధాన్ని పావురాలకు ఆహారంగా వేశాడు. దానిని తిని 30 పావురాలు మరణించాయి.
దీంతో వాటి యజమాని అయిన అలీ.. పోలీసులకు ఫిర్యాదు చేశాడు. పక్కింట్లో ఉండే అబీదే దీనికి కారణమని తేల్చిన పోలీసులు అతనితోపాటు మరో ముగ్గురిని అరెస్టు చేశారు. అయితే మాయమైన పిల్లి.. మళ్లీ అబిద్ ఇంటికి తిరిగి రావడం విశేషం.