Visit:
బెంగళూరు: పర్యాటకులతో ఉన్న ఒక వాహనాన్ని పులి తన పంటితో లాగింది. పులి ఎంత బలమైందో నిరూపించిన ఈ అరుదైన ఘటన కర్ణాటక రాజధాని బెంగళూరు సమీపంలోని బన్నెరఘట్ట నేషనల్ పార్క్‌లో జరిగింది. మహీంద్రా కంపెనీకి చెందిన జైలో (Xylo) ఎస్‌యూవీలో కొందరు పర్యాటకులు టైగర్ సఫారీకి వెళ్లారు. కాగా, ఆగి ఉన్న ఆ కారు వెనక ఉన్న బంపర్‌ను ఒక పులి తన పళ్లలో పలుమార్లు కొరుకుతుంది. చివరకు దానికి పట్టు దొరకడంతో బంపర్‌ను తన పళ్లతో గట్టిగా పట్టుకుని వెనక్కి లాగుతుంది. దీంతో ఆ కారు మెల్లగా వెనక్కి కదులుతుంది. మరో వాహనంలోని పర్యాటకులు దీనిని వీడియో తీశారు. ‘ఓ మైగాడ్‌.. కారును పులి లాగేస్తోంది’ అని ఒకరు గట్టిగా అరిచినట్లు అందులో ఉన్నది.
ప్రముఖ పారిశ్రామికవేత్త, మహింద్రా గ్రూప్‌ చైర్మన్‌ ఆనంద్ మహీంద్రా తన ట్విట్టర్‌లో ఈ వీడియోను గురువారం షేర్‌ చేశారు. ‘దావానలంలా సిగ్నల్ చుట్టూ తిరుగుతోంది. ఊటీ నుండి మైసూర్ రోడ్డులోని తెప్పకాడు సమీపంలో ఇది జరిగింది. ఆ కారు జైలో కాబట్టి పులి దానిని నమలడంలో నేను ఆశ్చర్యపోనవసరం లేదు. బహుశా మహీంద్రా కార్లు డీలీసియస్ అన్న నా అభిప్రాయాన్ని అది తెలియజేసింది’ అని అందులో పేర్కొన్నారు.
కాగా, ఈ వీడియో సోషల్‌ మీడియాలో వైరల్‌ అయ్యింది. ఒక్క రోజులోనే నాలుగు లక్షల మందికిపైగా దీనిని చూశారు. నెటిజన్లు భిన్నంగా స్పందించారు. ‘పులి పళ్లు చాలా బలంగా ఉన్నాయి. పెప్సోడెంట్ లేదా క్లోజప్ టూత్‌పేస్ట్‌ వాడుతోందా?’ అంటూ ఒకరు చమత్కరించారు. ‘Xylo సామర్థ్యాన్ని ‘హార్స్ పవర్’ కంటే ‘టైగర్ పవర్’లో రేట్ చేయడానికి అర్హత ఉందా?’ అంటూ మరొకరు ప్రశ్నించారు. ‘పార్క్ మోడ్‌లోని జైలోను సులభంగా వెనక్కి లాగుతున్న పులి. ఇది గొప్ప భద్రతా ప్రకటన కాదు సార్!’ అంటూ ఒకరు వ్యాఖ్యానించారు.
మరోవైపు, తాను జైలో కారులో ఉన్నప్పుడు తీసిన ఈ వీడియోను ఆనంద్ మహేంద్రా షేర్‌ చేయడంపై యా‌ష్ షా అనే వ్యక్తి హర్షం వ్యక్తం చేశారు. గత ఏడాది నవంబర్‌ 22న బన్నెరఘట్ట నేషనల్ పార్క్‌లో ఈ ఘటన జరిగినట్లు ఆయన తెలిపారు. అప్పుడు కారు ఆగిపోయిందని, స్టార్ట్‌ కాలేదన్నారు. ఇంతలో కారు వెనక ఉన్న బంపర్‌ను ఒక పులి తన పళ్లతో పట్టి బలంగా వెనక్కి లాగిందన్నారు. టీషర్ట్‌లో ఉన్నది తానేనని, తన కుటుంబం కూడా వెంట ఉన్నదని పేర్కొన్నారు. మరో యాంగిల్‌లో తీసిన వీడియోను ఆయన షేర్‌ చేశారు.
