Solar Eclipse | రేపు వినీలాకాశంలో అద్భుతం ఆవిష్కృ తం కాబోతున్నది. సంపూర్ణ సూర్యగ్రహణం ఏర్పడబోతున్నది. దాదాపు 50 సంవత్సరాల తర్వాత సుదీర్ఘ సమయం పాటు గ్రహణం దర్శనమివ్వనున్నది. సూర్యుడికి, భూమికి మధ్య చంద్రుడు అడ్డురావడంతో భూమిపై నీడపడుతుంది. దీన్ని సూర్యగ్రహణంగా పేర్కొంటారు. గ్రహణ సమయంలో సూర్యుడు, చంద్రుడు, భూమి ఒకే రేఖలోకి రానున్నాయి. ఈ సూర్యగ్రహణం ముందుగా మెక్సికో, అమెరికా, కెనడాలో కనిపించనున్నది. అయితే, భారత్లో మాత్రం కనిపించదని ఖగోళశాస్త్రవేత్తలు తెలిపారు.
భారత కాలమానం ప్రకారం.. సంపూర్ణ సూర్యగ్రహణం సోమవారం రాత్రి 9.12 గంటలకు ప్రారంభమవుతుంది. రాత్రి 10.08 గంట వరకు గ్రహణం సంపూర్ణ గ్రహణం కనిపిస్తుంది. 9న తెల్లవారు జామున 2.22 గంటలకు గ్రహణం పూర్తవుతుంది. దాదాపు నాలుగు గంటలకుపైగా గ్రహణం కొనసాగనున్నది. సోమవారం ఏర్పడనున్న గ్రహణం అత్యంత సుదీర్ఘమైన సూర్యగ్రహణమని శాస్త్రవేత్తలు పేర్కొంటున్నారు. ఈ అద్భుతమైన గ్రహణం 50 సంవత్సరాల కిందట కనిపించింది. ఇదిలా ఉండగా.. ఖగోళ అద్భుతం మెక్సికో పసిఫిక్ తీరంలో భారత కాలమానం ప్రకారం రాత్రి 11.07గంటలకు కనిపిస్తుంది.
టెక్సాస్, ఓక్లహోమా, అర్కాన్సాస్, మిస్సౌరీ, ఇల్లినాయిస్, కెంటుకీ, ఇండియానా, ఒహియో, పెన్సిల్వేనియా, న్యూయార్క్, వెర్మోంట్, న్యూ హాంప్షైర్, మైనేతో సహా అనేక అమెరికా రాష్ట్రాలలో గ్రహణం కనువిందు చేయనుంది. మిచిగాన్తో పలు ప్రాంతాల్లో పాక్షిక గ్రహణం కనిపించనున్నది. మెక్సికో నుంచి కెనడాలోకి ప్రవేశించి దక్షిణ అంటారియో, క్యూబెక్, న్యూ బ్రున్స్విక్, ప్రిన్స్ ఎడ్వర్డ్ ఐలాండ్, కేప్ బ్రెటన్ తదితర ప్రాంతాల్లో కనిపిస్తుంది. అయితే, ఈ గ్రహణం భారత్లో కనిపించదని శాస్త్రవేత్తలు పేర్కొన్నారు. ఈ గ్రహణాన్ని నాసా ప్రత్యక్ష ప్రసారం చేయనున్నది.