భౌతికదూరం ప్రాధాన్యం.. జార్ఖండ్‌ పిల్లల ప్రయోగం!

కరోనాకు అడ్డుకట్ట వేయడానికి భౌతికదూరం పాటించటం ఎంత ముఖ్యమో చెప్పడానికి శనివారం కేంద్ర ఆరోగ్యశాఖ ఓ వీడియోను విడుదల చేసింది. జార్ఖండ్‌లోని ఓ గ్రామానికి చెందిన పిల్లలు ఈ వీడియోను రూపొందించడం విశేషం. భౌతికదూరం ప్రాధాన్యాన్ని చెప్పడంలో భాగంగా పిల్లలు.. కొన్ని ఇటుకలను ఒకదాని పక్కన ఒకటి (కిందపడితే మరో ఇటుకను తాకే విధంగా) నిలబెట్టారు. ఒక ఇటుకను పడేస్తే అది మరో ఇటుకను తాకి, అది మరో ఇటుకను ఇలా అన్ని ఇటుకలు పడిపోయాయి. మరోసారి ఇటుకలను అలాగే నిలబెట్టి ముందు ఉన్న ఇటుకను నెట్టారు. అది తగలటం వల్ల దానితర్వాత ఉన్న ఇటుకలు కూడా పడటం ప్రారంభమైంది. అయితే, ఒక పిల్లవాడు ఆ వరుసలో ఉన్న ఓ ఇటుకను తొలగించాడు. దీంతో దానికి ముందున్న ఇటుక పడినా కూడా.. పక్క ఇటుకపై పడనంత దూరం ఉంది. దీనివల్ల, తర్వాత ఇటుకలు ఏవీ పడకుండా అలాగే నిల్చున్నాయి. భౌతిక దూరం పాటిస్తే వైరస్‌ వ్యాప్తి కూడా ఒక స్థాయి వరకే పరిమితం అవుతుందని చెప్పడం కోసం ఆ గ్రామీణ చిన్నారులు ఈ సులువైన ప్రయోగం చేసి చూపించారు. ఈ వీడియోను కేంద్రం కరోనాపై అవగాహన కల్పించడం కోసం విడుదల చేసింది.