న్యూఢిల్లీ: కోతుల చేష్టలు అంతా ఇంతా కాదు. మనుషుల్ని సతాయించడంలో అవి నెంబర్ వన్. యూపీలోని వృందావన్ గుడిలో ఓ కోతి హంగామా చేసింది. ఓ వ్యక్తి చేతుల్లోంచి ఖరీదైన ఐఫోన్(iPhone) ఎత్తుకెళ్లింది. శ్రీ రంగనాథ్ జీ మందిర్ గోడపై కూర్చున్న ఆ కోతి తన చేతుల్లోని ఫోన్ ఇచ్చేందుకు నిరాకరించింది. ఇక ఆ కోతిని ఒప్పించేందుకు చాలా మంది చాలా ప్రయత్నాలు చేశారు. గోడ వద్ద గుమ్మికూడిన జనం ఆ కోతి దిశగా ఫ్రూటీలు విసిరారు. చివరకు ఓ ఫ్రూటీ ప్యాక్ అందుకున్న ఆ కోతి.. ఆ సమయంలో తన చేతుల్లో ఉన్న ఫోన్ను వదిలేసింది. కింద ఉన్న వ్యక్తి కోతి వదిలిన ఐఫోన్ను చాకచక్యంగా అందుకున్నాడు. దీంతో ఆ వ్యక్తి ఊపిరిపీల్చుకున్నాడు. ఈ ఘటనకు చెందిన వీడియో ఒకటి ఇన్స్టాలో పోస్టు చేశారు. ఆ వీడియో ప్రస్తుతం వైరల్ అవుతోంది.