వరుస సెలవులు.. కేరళలో తగ్గిన కరోనా కేసులు

తిరువనంతపురం: మొహర్రం, ఓనం, రక్షాబంధన్‌ వంటి వరుస సెలవుల నేపథ్యంలో కేరళలో కరోనా కేసుల నమోదు తగ్గింది. గత నెల రోజులుగా 20 వేలకుపైగా కరోనా కేసులు నమోదవుతున్నాయి. కరోనా యాక్టివ్ ‌కేసులు కూడా 1.6 లక్షలకు పెరిగాయి. వందల సంఖ్యలో మరణాలు రికార్డవుతున్నాయి. కాగా, శనివారం నుంచి ఆదివారం వరకు గత 24 గంటల్లో కొత్తగా 10,402 కరోనా కేసులు, 66 మరణాలు నమోదయ్యాయి. దీంతో ఆ రాష్ట్రంలో మొత్తం కరోనా కేసుల సంఖ్య 38,14,305కు, మొత్తం మరణాల సంఖ్య 19,494కు పెరిగింది.

మరోవైపు గత 24 గంటల్లో 25,586 మంది కరోనా రోగులు కోలుకుని ఆసుపత్రుల నుంచి డిశ్చార్జ్ అయినట్లు కేరళ ఆరోగ్య శాఖ తెలిపింది. దీంతో కరోనా నుంచి కోలుకున్న వారి మొత్తం సంఖ్య 36,31,066కు చేరుకున్నదని, ప్రస్తుతం రాష్ట్రంలో 1,63,212 యాక్టివ్‌ కేసులు ఉన్నట్లు పేర్కొంది. కాగా, దేశంలో కరోనా హాట్‌స్పాట్‌గా కేరళ కొనసాగుతున్నది. ఆ రాష్ట్రంలో ‌పాజిటివిటీ రేటు 16.41 శాతంగా ఉన్నది.