చైనా ఏజెంట్లకు సున్నిత సమాచారం.. సైనికాధికారి భార్యపై ఎఫ్‌ఐఆర్‌

విద్యావేత్తల ముసుగులో ఉన్న చైనా నిఘా ఏజెంట్లతో దేశ భద్రతకు సంబంధించిన సున్నితమైన సమాచారం పంచుకొన్నందుకు సీనియర్‌ సైనికాధికారి భార్యపై జమ్ము కశ్మీర్‌ పోలీసులు ఎఫ్‌ఐఆర్‌ నమోదు చేశారు.

శ్రీనగర్‌ : విద్యావేత్తల ముసుగులో ఉన్న చైనా నిఘా ఏజెంట్లతో దేశ భద్రతకు సంబంధించిన సున్నితమైన సమాచారం పంచుకొన్నందుకు సీనియర్‌ సైనికాధికారి భార్యపై జమ్ము కశ్మీర్‌ పోలీసులు ఎఫ్‌ఐఆర్‌ నమోదు చేశారు. తెలంగాణకు చెందిన నిందితురాలు ప్రస్తుతం జమ్ములో నివసిస్తున్నారు. అయితే తనను సంప్రదించినవారు చైనా నిఘా వర్గాలకు చెందినవారన్న విషయాన్ని గ్రహించలేక ఆమె వారితో సమాచారాన్ని పంచుకొన్నట్టు తెలిసింది.

ప్రాథమిక దర్యాప్తు ప్రకారం.. చైనా నిఘా ఏజెంట్లు విద్యావేత్తల్లా నటించి సైనికాధికారి భార్యను వ్యూహాత్మక, ఆపరేషనల్‌ అంశాలపై వ్యాసాలు రాయాల్సిందిగా కోరారు. తొలుత వారు పర్యావరణం, రాజకీయాలపై భౌగోళిక అంశాల ప్రభావం గురించి వ్యాసాలు రాయమని కోరారు. ఆ తర్వాత రక్షణ అంశాలపై వ్యాసాలు రాసేలా ఆమెను మళ్లించారు. దేశ భద్రతపై ప్రత్యక్ష ప్రభావం చూపే సున్నితమైన డాటాను ఇతరులకు చేరవేయడంలో ఆమె ప్రమేయం ఉందన్న విశ్వసనీయ వర్గాల సమాచారం మేరకు ఆమెపై నిఘా పెట్టారు.