Man’s Revenge Robbery | యజమాని కొడుకు అవమానించడంపై వ్యక్తి ప్రతీకారం.. కోట్లలో డబ్బు దోపిడీ

Man’s Revenge Robbery | ట్రాన్స్‌పోర్ట్‌ యజమాని కొడుకు అవమానించడంపై ఒక వ్యక్తి ప్రతీకారం తీర్చుకున్నాడు. 15 మందితో ఒక బృందాన్ని ఏర్పాటు చేశాడు. ఆ కంపెనీకి చెందిన కోట్ల నగదును దోచుకున్నాడు. యాజమాని ఫిర్యాదుపై స్పందించిన పోలీసులు 12 మంది నిందితులను అరెస్ట్‌ చేశారు.

న్యూఢిల్లీ: ట్రాన్స్‌పోర్ట్‌ యజమాని కొడుకు అవమానించడంపై ఒక వ్యక్తి ప్రతీకారం తీర్చుకున్నాడు. (Man’s Revenge Robbery) 15 మందితో ఒక బృందాన్ని ఏర్పాటు చేశాడు. ఆ కంపెనీకి చెందిన కోట్ల నగదును దోచుకున్నాడు. యాజమాని ఫిర్యాదుపై స్పందించిన పోలీసులు 12 మంది నిందితులను అరెస్ట్‌ చేశారు. దేశ రాజధాని ఢిల్లీలో ఈ సంఘటన జరిగింది. కిషన్ గంజ్ ప్రాంతంలో ఉన్న బికనీర్ అస్సాం ట్రాన్స్‌పోర్ట్ కార్యాలయంలో క్యాబ్‌ డ్రైవర్‌గా ఉపేంద్ర పని చేస్తున్నాడు. యజమాని కుమారుడు అతడ్ని అవమానించడంపై ప్రతీకారం తీర్చుకోవాలని భావించాడు.

కాగా, ఆ ట్రాన్స్‌పోర్ట్‌ ఆఫీస్‌లో నగదు తరలింపు గురించి క్యాబ్ డ్రైవర్ ఉపేంద్రకు తెలుసు. దీంతో ఆ డబ్బును దోచుకోవాలని కుట్ర పన్నాడు. అదే కార్యాలయంలో పని చేసే లారీ డ్రైవర్ కైలాష్ చౌహాన్‌తో కలిసి ప్లాన్‌ వేశాడు. వారిద్దరూ కలిసి 15 మందితో కూడిన బృందాన్ని ఏర్పాటు చేశారు.

జూలై 11న ఆ ట్రాన్స్‌పోర్ట్‌ కార్యాలయానికి రూ.3.5 కోట్ల నగదు చేరింది. ఆ రోజు రాత్రి 15 మంది వ్యక్తులు ఆయుధాలతో ఆ ఆఫీస్‌లోకి చొరబడ్డారు. అక్కడున్న వారిని గన్స్‌తో బెదిరించారు. రూ.3.5 కోట్ల నగదు దోచుకుని రెండు కార్లలో పారిపోయారు.

మరోవైపు ట్రాన్స్‌పోర్ట్‌ యజమాని ఫిర్యాదుపై ఢిల్లీ పోలీసులు స్పందించారు. సీసీటీవీ ఫుటేజ్‌లను పరిశీలించి ఆ కార్లను గుర్తించారు. 12 మంది నిందితులను అరెస్ట్‌ చేశారు. వారి నుంచి రూ.1.15 కోట్ల నగదు స్వాధీనం చేసుకున్నారు. పరారీలో ఉన్న మిగతా ముగ్గురు వ్యక్తుల కోసం పోలీసులు వెతుకున్నారు.