కోవిడ్ చికిత్స నుంచి ఐవ‌ర్‌మెక్టీన్‌, హైడ్రోక్సీక్లోరోక్విన్ ఔట్‌

న్యూఢిల్లీ: కోవిడ్ చికిత్స కోసం ఐవ‌ర్‌మెక్టీన్‌, హైడ్రాక్సీక్లోరోక్విన్ ఔష‌ధాల‌ను వినియోగిస్తున్న విష‌యం తెలిసిందే. అయితే ఆ ఔష‌ధాల‌ను కోవిడ్ చికిత్స కోసం వాడ‌రాదు అని ఐసీఎంఆర్ నేతృత్వంలోని నేష‌న‌ల్ టాస్క్ ఫోర్స్ ఇవాళ కొత్త‌గా ఆదేశాలు జారీ చేసింది. వ‌యోజ‌న కోవిడ్‌19 రోగుల‌కు చికిత్స స‌మ‌యంలో ఆ రెండు ఔష‌ధాల‌ను వినియోగించ‌రాదు అని ఐసీఎంఆర్ టాస్క్ ఫోర్స్ చెప్పింది. కోవిడ్‌19 చికిత్స కోసం తాజాగా రిలీజ్ చేసిన మార్గ‌ద‌ర్శ‌కాల్లో ఐసీఎంఆర్ ఈ విష‌యాన్ని తెలిపింది. క‌రోనా వైర‌స్ ప‌ట్ల ఆ ఔష‌ధాలు ప్ర‌భావంతంగా ప‌నిచేసిన‌ట్లు తేల‌లేద‌ని ప్ర‌భుత్వ వ‌ర్గాలు పేర్కొన్నాయి. అయినా ట్ర‌య‌ల్ ప‌ద్ధ‌తిలో ఆ రెండు మందుల‌ను వాడేందుకు ప్ర‌భుత్వం అనుమ‌తి ఇచ్చింది. యాంటీపార‌సైటిక్ మెడిసిన్ ఐవ‌ర్‌మెక్టీన్ వాడ‌డం వ‌ల్ల‌.. కోవిడ్ రోగుల్లో వైర‌ల్ లోడ్ కానీ, ల‌క్ష‌ణాలు కానీ త‌గ్గ‌లేద‌ని ఎయిమ్స్ అధ్య‌య‌నంలో తేలింది. అధిక డోసుల్లో ఐవ‌ర్‌మెక్టీన్ ఇచ్చినా ఫ‌లితం క‌న‌బ‌డ‌లేదు. ఇక హైడ్రాక్సీక్లోరోక్విన్ వ‌ల్ల కూడా మ‌ర‌ణాల సంఖ్య త‌గ్గ‌లేద‌ని ఓ నివేదిక తేల్చింది. అంతేకాదు, అజిత్రోమైసిన్‌తో క‌లిపి ఆ మందును వాడితే దాంతో సైడ్ ఎఫెక్ట్స్ వ‌స్తున్న‌ట్లు గుర్తించారు. ఇష్టానుసారంగా ఐవ‌ర్‌మెక్టీన్ ఔష‌ధాన్ని వాడ‌కూడ‌ద‌ని ప్ర‌పంచ ఆరోగ్య సంస్థ వార్నింగ్ ఇచ్చిన విష‌యం తెలిసిందే.