Visit:
కోల్కతా: ఓటరు జాబితాను ప్రక్షాళన చేసినందుకు ప్రధాన ఎన్నికల కమిషనర్ (సీఈసీ) జ్ఞానేష్ కుమార్, పద్మభూషణ్కు అర్హులని పశ్చిమ బెంగాల్ బీజేపీ అధ్యక్షుడు సమీక్ భట్టాచార్య అన్నారు. రాష్ట్రంలో హింసారహితంగా అసెంబ్లీ ఎన్నికలు జరిగేలా ఆయన చర్యలు చేపట్టారని కొనియాడారు. (Gyanesh Kumar) ప్రత్యేక విస్తృత ఓటరు జాబితాల సవరణ (సర్) ప్రక్రియపై ఇద్దరు ఎన్నికల కమిషనర్లు అభ్యంతరం వ్యక్తం చేసినప్పటికీ, సీఈసీ జ్ఞానేష్ కుమార్ ఏకపక్షంగా నిర్ణయం తీసుకున్నట్లు వార్తా కథనాలు వచ్చాయి. ఈ నేపథ్యంలో సీఈసీపై విమర్శలు రావడంతో పాటు ఆయన రాజీనామా చేయాలన్న డిమాండ్లు ఊపందుకున్నాయి.
కాగా, ఈ వివాదం నేపథ్యంలో ప్రధాన ఎన్నికల కమిషనర్ (సీఈసీ) జ్ఞానేష్ కుమార్ను బెంగాల్ బీజేపీ అధ్యక్షుడు సమీక్ భట్టాచార్య ప్రశంసలతో ముంచెత్తారు. భారతదేశపు మూడవ అత్యున్నత పౌర పురస్కారమైన పద్మభూషణ్ ఆయనకు ఇవ్వాలని ప్రతిపాదించారు. ‘జ్ఞానేష్ కుమార్ కనీసం ‘పద్మ భూషణ్’ పురస్కారానికైనా అర్హులు. చాలా కాలం తర్వాత బెదిరింపులకు తావులేకుండా, ఎన్నికల సమయంలో ఎలాంటి హత్యలు జరుగకుండా, ప్రజలు తమ ఓటు హక్కును స్వేచ్ఛగా వినియోగించుకునేలా పరిస్థితులు ఉండటం పట్ల పశ్చిమ బెంగాల్ ప్రజలు సంతోషంగా ఉన్నారు’ అని అన్నారు.
మరోవైపు బెంగాల్లోని ఓటర్ల జాబితాను ‘ప్రక్షాళన’ చేయడంలో సీఈసీ జ్ఞానేష్ కుమార్ కీలక పాత్ర పోషించారని సమీక్ భట్టాచార్య తెలిపారు. పశ్చిమ బెంగాల్ వంటి సరిహద్దు రాష్ట్రంలో ఓటర్ల జాబితా నుంచి బంగ్లాదేశ్ చొరబాటుదారుల పేర్లను తొలగించే విషయంలో ఆయన చొరవ తీసుకున్నారంటూ కొనియాడారు.
