video | పారాసెయిలింగ్‌ తాడు తెగి.. సముద్రంలో పడిన జంట
డయ్యూ: పారాసెయిలింగ్‌ తాడు తెగడంతో ఒక జంట సముద్రంలో పడింది. కేంద్ర పాలిత ప్రాంతం డయ్యూలో ఈ ఘటన జరిగింది. గుజరాత్‌కు చెందిన అజిత్ కథద్, భార్య సరళతో కలిసి ఆదివారం గుజరాత్‌లోని ఉనా తీరం బీచ్‌లో పారాసెయిలింగ్‌ చేశారు. పడవలో ఉన్న అజిత్ సోదరుడు రాకేశ్‌ దీనిని వీడియో తీశారు. అయితే ఆ దంపతులు చాలా ఎత్తుకు ఎగిరిన తర్వాత పడవ, పారాసెయిలింగ్‌ మధ్య ఉన్న తాడు తెగిపోయింది. దీంతో ఆ జంట సముద్రంలో పడిపోయింది.
కాగా, ఈ ప్రమాదంలో అజిత్, ఆయన భార్యకు ఎలాంటి గాయాలు కాలేదు. వారు లైఫ్‌ జాకెట్లు ధరించడంతో సముద్రంలో మునిగిపోకుండా నీటిపై తేలారు. బీచ్‌ రెస్క్యూ సిబ్బంది వెంటనే వారిని కాపాడారు. ఈ ఘటనపై వారు చాలా ఆందోళన చెందారు. తన భార్య చాలా సేపు షాక్‌లో ఉన్నదని అజిత్ తెలిపారు. తాము లైఫ్‌ జాకెట్లు ధరించడంతో ప్రాణాలతో బయటపడ్డామని చెప్పారు.
పారాసెయిలింగ్‌ బోటు సిబ్బంది తమను పట్టించుకోలేదని అజిత్ ఆరోపించారు. కొంత సేపటి తర్వాత రెస్క్యూ సిబ్బంది వచ్చి తమను కాపాడినట్లు ఆయన తెలిపారు. నిర్లక్ష్యంగా వ్యవహరించిన వారిపై అధికారులు చర్యలు తీసుకోవాలని అజిత్ సోదరుడు డిమాండ్‌ చేశారు. మరోవైపు ఈ వీడియో సోషల్‌ మీడియాలో వైరల్‌ అయ్యింది.
Read Today's Latest National News in Telugu and Telugu News
- Follow Us :
-
