HD Deve Gowda: భార్య‌తో క‌లిసి ఓటేసిన మాజీ ప్ర‌ధాని దేవ‌గౌడ‌

HD Devegowda: 89 ఏళ్ల మాజీ ప్ర‌ధాని హెచ్‌డీ దేవ‌గౌడ.. క‌ర్నాట‌క ఎన్నిక‌ల్లో ఓటేశారు. హ‌స‌న్ జిల్లాలో ఆయ‌న త‌న స‌తీమ‌ణితో క‌లిసి పోలింగ్ బూత్‌కు వెళ్లారు. జేడీఎస్ పార్టీ కింగ్‌మేక‌ర్‌గా మారే అవ‌శాలు ఉన్న‌ట్లు ఊహాగానాలు వినిపిస్తున్నాయి.

హ‌స‌న్‌: జేడీఎస్ చీఫ్‌, మాజీ ప్ర‌ధాని హెచ్‌డీ దేవ‌గౌడ(HD Deve Gowda) ఇవాళ త‌న ఓటు హ‌క్కును వినియోగించుకున్నారు. క‌ర్నాట‌క అసెంబ్లీ ఎన్నిక‌ల్లో ఆయ‌న స‌తీస‌మేతంగా ఓటు వేశారు. మాజీ ప్ర‌ధాని దేవ‌గౌడ వ‌య‌సు 89 ఏళ్లు. ఆయ‌న భార్య చెన్న‌మ్మ‌తో క‌లిసి వ‌చ్చి ఓటు వేశారు. హ‌స‌న్ జిల్లాలోని స్వ‌గ్రామ‌మైన హ‌ర‌ద‌న‌హ‌ల్లిలో ఆయ‌న ఓటేశారు. ప్ర‌స్తుతం ఆ గ్రామం హెచ్‌డీ రేవ‌న్న ప‌రిధిలోకి వ‌స్తుంది. ఇదో చిన్న‌గ్రామం అని, ఇక్క‌డ అన్ని ర‌కాల అభివృద్ధి జ‌రిగింద‌ని, హెచ్‌డీ రేవ‌న్న‌కు ఆ క్రెడిట్ ఇవ్వాల‌ని హెచ్‌డీ దేవ‌గౌడ అన్నారు.

మాజీ ప్ర‌ధాని దేవ‌గౌడ.. క‌ర్నాట‌క ఎన్నికల ప్ర‌చారంలో విస్తృతంగా పాల్గొన్నారు. దాదాపు 90 ఏళ్లు ఉన్న ఆయ‌న‌.. ఇటీవ‌ల అవిశ్రాంతంగా ప్ర‌చారం నిర్వ‌హించారు. హోలెన‌ర్సిపుర అసెంబ్లీ నియోజ‌క‌వ‌ర్గం నుంచి గ‌తంలో ఆయ‌న ఆరుసార్లు గెలిచారు. ఆ నియోజ‌క‌వ‌ర్గంలో ఇటీవ‌ల ఆయ‌న ప‌ర్య‌టించారు. 1994లో ఇక్క‌డ నుంచి గెలిచి ఆయ‌న సీఎం అయ్యారు.

ఈసారి ప్ర‌చారంలో భాగంగా ఆయ‌న 38 అసెంబ్లీ నియోజ‌క‌వ‌ర్గాల‌ను క‌వ‌ర్ చేశారు. దాదాపు 68 ర్యాలీల్లో ప్ర‌సంగించారు. ఎక్కువ శాతం ఆయ‌న ద‌క్షిణ క‌ర్నాట‌క ప్రాంతంలోనే ప‌ర్య‌ట‌న చేశారు. క‌ర్నాట‌క‌లో యాక్టివ్‌గా ఉన్న అత్యంత వృద్ధ నేత‌ల్లో దేవ‌గౌడ రెండవ వ్య‌క్తిగా నిలిచారు. కాంగ్రెస్ పార్టీకి చెందిన 92 ఏళ్ల ష‌మ్మ‌నూరు శివ‌శంక‌ర‌ప్ప ఈసారి దేవ‌న‌గిరి సౌత్ నుంచి పోటీ చేస్తున్నారు.