Honey Bees |‘ఈ భూమిపై తేనెటీగలు అంతరిస్తే, ఆ తర్వాత నాలుగేండ్లకు మానవ జాతి కూడా అంతరిస్తుంది. తేనేటీగలు లేకపోతే పరపరాగ సంపర్కం ఉండదు, మొక్కలు, పంటలు ఉండవు, జంతువులూ ఉండవు’ అని గ్రీన్ బెల్ట్ అండ్ రోడ్ ఇన్స్టిట్యూట్ అధ్యక్షుడు ఎరిక్ సోలెమ్ తెలిపారు. మానవాళి మనుగడకు తేనేటీగలు ఎంత ముఖ్యమో, అవి మనకు ఎలా సాయం చేస్తాయో ఒక వీడియోలో తెలియజేశారు. యూనివర్సిటీ ఆఫ్ మాంచెస్టర్ మ్యాగజైన్ కూడా ఈ విషయాన్ని సమర్థించింది.
ప్రపంచ వ్యాప్తంగా 87 శాతం పంటలు జంతువుల వల్ల కలిగే పరపరాగ సంపర్కం వల్లే పండుతాయి. అందులోనూ తెనెటీగల వల్ల కలిగే పరపరాగ సంపర్కమే ఎక్కువ. తేనెటీగలు తమ జీవిత కాలంలో వేల పువ్వులపై వాలి మకరందాన్ని సేకరిస్తాయి. ఈ క్రమంలో అవి మొక్కల మధ్య పరపరాగ సంపర్కాన్ని పెంపొందిస్తాయి. దీని వల్ల పంటల ఉత్పత్తి, కొత్త మొక్కల పెరుగుదల సులువవుతున్నది. అయితే కాలుష్యం, రసాయన ఎరువులు, పట్టణీకరణ వల్ల తేనెటీగల సంఖ్య తగ్గిపోతుండటంతో పర్యావరణ వేత్తలు ఆందోళన వ్యక్తం చేస్తున్నారు.
తేనెటీగలకు హాని కలిగించే, అవి పువ్వుల సువాసనను గుర్తించకుండా చేసే రసాయన ఎరువుల వాడకాన్ని తగ్గించాలి. వాటికి కలిగే ఇన్ఫెక్షన్లకు ఔషధాలు కనిపెట్టాలి. తేనెటీగల సంతానోత్పత్తి సామర్థ్యాన్ని పెంచడానికి దెబ్బ తిన్న తేనెపట్టులను ఐసోలేషన్లో ఉంచాలి. ప్రకృతి వ్యవసాయాన్ని ప్రోత్సహించాలి.
– నేషనల్ డెస్క్