Visit:
Chandigarh : చండీగఢ్లో ఒక హెడ్ కానిస్టేబుల్ అనుమానాస్పదంగా మరణించాడు. తుపాకీతో కాల్చడం వల్ల అతడు మరణించాడు. అయితే, అతడి కొడుకే ఈ హత్యకు పాల్పడ్డాడా అనే అనుమానాలు వ్యక్తమవుతున్నాయి. ఈ ఘటనకు సంబంధించిన పూర్తి వివరాలివి. నితిన్ అనే హెడ్ కానిస్టేబుల్ చండీగడ్ పోలీస్ హెడ్క్వార్టర్స్, అకౌంట్స్ బ్రాంచ్లో పని చేస్తున్నాడు.
సెక్టార్ 22లోని తన ఇంటిలో నితిన్ కాల్పుల కారణంగా మరణించాడు. ఉదయం ఇంటి నుంచి కాల్పుల శబ్దం వినిపించిందని ఇరుగుపొరుగు వారు చెప్పారు. దీంతో వారు పోలీసులకు సమాచారం అందించారు. వెంటనే సమాచారం అందుకున్న పోలీసులు ఘటనా స్థలానికి చేరుకున్నారు. ఈ సమయంలో నితిన్ భార్య, కొడుకు ఇంట్లోనే ఉన్నారు. అయితే, ఈ కాల్పులు ఎవరు జరిపారు.. అతడు ఎలా మరణించాడు.. కారణాలు ఏంటి అనే అంశంపై పోలీసులు విచారణ జరుపుతున్నారు. ఘటనా స్థలం నుంచి ఒక దేశీ పిస్టల్ను పోలీసులు స్వాధీనం చేసుకున్నారు.
ఈ పిస్టల్ నుంచి వచ్చిన బుల్లెట్ కారణంగానే నితిన్ మరణించినట్లు తేలింది. చండీగఢ్ ఎస్ఎస్పీ కన్వర్దీప్ కౌర్ ఘటనా స్థలానికి చేరుకుని పరిశీలించారు. పోలీసులు ఆధారాలు సేకరించారు. అయితే, ప్రాథమికంగా నితిన్ మైనర్ కొడుకు ఈ కాల్పులకు పాల్పడి ఉండవచ్చని అనుమానిస్తున్నారు. అయితే, ఈ విషయంలో ఇప్పటికిప్పుడు ఎలాంటి స్పష్టతనివ్వలేమని పోలీసులు తెలిపారు. ప్రస్తుతం విచారణ జరుగుతోందని, ఆ తర్వాతే పూర్తి వివరాలు తెలుస్తాయని కౌర్ వివరించారు.
