సామాజిక మాధ్యమాలకు చట్ట ‘రక్షణ’ తొలగింపు?

ఫేస్‌బుక్‌, ఇన్‌స్టాగ్రామ్‌, యూట్యూబ్‌, ఎక్స్‌ వంటి సోషల్‌ మీడియా ప్లాట్‌ఫామ్‌లకు కల్పించిన చట్టపరమైన రక్షణను తొలగించే అంశాన్ని కేంద్ర ప్రభుత్వం పరిశీలిస్తున్నది. ది ఇండియన్‌ ఎక్స్‌ప్రెస్‌ ప్రచురించిన కథనం ప్రకారం సోషల్‌ మీడియా నిబంధనల్లో మార్పులపై ఐటీ మంత్రిత్వశాఖ చర్చలు ప్రారంభించింది. ప్రతిపాదిత మార్పుల ప్రకారం వినియోగదారుల పోస్టులు, వీడియోలు, కామెంట్లకు కూడా ప్లాట్‌ఫామ్‌లు బాధ్యత వహించాల్సి రావచ్చు.

• కంటెంట్‌పై యూజర్లతోపాటు కంపెనీలకూ బాధ్యత
• చట్టంలో కీలక సవరణలకు కేంద్ర ప్రభుత్వం కసరత్తు
• భావ ప్రకటనా స్వేచ్ఛకు విఘాతమని నిపుణుల ఆందోళన

న్యూఢిల్లీ, నవంబర్‌ 5: ఫేస్‌బుక్‌, ఇన్‌స్టాగ్రామ్‌, యూట్యూబ్‌, ఎక్స్‌ వంటి సోషల్‌ మీడియా ప్లాట్‌ఫామ్‌లకు కల్పించిన చట్టపరమైన రక్షణను తొలగించే అంశాన్ని కేంద్ర ప్రభుత్వం పరిశీలిస్తున్నది. ది ఇండియన్‌ ఎక్స్‌ప్రెస్‌ ప్రచురించిన కథనం ప్రకారం సోషల్‌ మీడియా నిబంధనల్లో మార్పులపై ఐటీ మంత్రిత్వశాఖ చర్చలు ప్రారంభించింది. ప్రతిపాదిత మార్పుల ప్రకారం వినియోగదారుల పోస్టులు, వీడియోలు, కామెంట్లకు కూడా ప్లాట్‌ఫామ్‌లు బాధ్యత వహించాల్సి రావచ్చు. ప్రస్తుతం ఐటీ చట్టంలోని సెక్షన్‌ 79 ఈ కంపెనీలకు సంపూర్ణ రక్షణను అందిస్తున్నది. ఈ నిబంధన ప్రకారం వినియోగదారులు పోస్టు చేసిన కంటెంట్‌కు లేదా చేసిన వ్యాఖ్యలకు కంపెనీలు నేరుగా బాధ్యత వహించవు. సోషల్‌ మీడియా కంపెనీలకు ఉన్న ఈ రక్షణను తొలగించి దానిని ఇంటర్నెట్‌, టెలికం, మెసేజింగ్‌ ప్లాట్‌ఫామ్‌లకు మాత్రమే పరిమితం చేయాలని ప్రభుత్వం యోచిస్తున్నది.

రక్షణతో లబ్ధి
వినియోగదారు సృష్టించిన కంటెంట్‌ ఆధారంగా ప్రధాన వ్యాపారాలను నిర్మించుకోవడానికి మెటా, గూగుల్‌, ఎక్స్‌ వంటి కంపెనీలకు చట్టపరమైన ఈ రక్షణ సహాయపడింది. వినియోగదారుడు పోస్టు చేసిన ప్రతి పోస్టు, వీడియో లేదా వ్యాఖ్యకు ఈ కంపెనీలు చట్టపరమైన బాధ్యత వహించాల్సిన అవసరం లేదు. సోషల్‌ మీడియా ప్లాట్‌ఫామ్‌లు ఇకపై కేవలం సమాచారాన్ని వ్యాప్తి చేసే మాధ్యమంగా మాత్రమే లేవని ప్రభుత్వంలోని ఒక వర్గం భావిస్తున్నది. ఇవి కంటెంట్‌ ర్యాంకింగ్‌, సిఫార్సు, వ్యాప్తిని నిర్ధారించడానికి పరిష్కార మార్గాన్ని ఉపయోగిస్తున్నట్టు వాదిస్తున్నది. ఈ ప్లాట్‌ఫామ్‌లు తమ కమ్యూనిటీ మార్గదర్శకాల ఆధారంగా పోస్టులను తొలగిస్తాయి లేదా పరిమితం చేస్తాయి. ఈ నియమాలు కొన్నిసార్లు భారతీయ చట్టాలకు భిన్నంగా ఉండవచ్చు.

భావ ప్రకటనా స్వేచ్ఛకు సంకెళ్లు!
సామాజిక మాధ్యమ వేదికల్లో చట్టవిరుద్ధ కంటెంట్‌ వ్యాప్తిని అడ్డుకోవడంలో ఈ ప్రతిపాదన సంస్థల జవాబుదారీతనాన్ని పెంచవచ్చు. అయితే ప్రభుత్వాన్ని విమర్శించే పోస్టులపై నిఘా, సెన్సార్‌షిప్‌ పెరిగే ప్రమాదం ఉందన్న ఆందోళనలు కూడా వ్యక్తమవుతున్నాయి. ఈ ప్రతిపాదనపై కేంద్రం ఇంకా తుది నిర్ణయం తీసుకోలేదు.