తండ్రి వ‌ల్ల తీవ్ర మ‌నోవేద‌న‌కు గుర‌వుతున్నా: బ్రిట్నీ స్పియ‌ర్స్‌

న్యూయార్క్: అమెరికా పాప్ స్టార్ బ్రిట్నీ స్పియ‌ర్స్ తీవ్ర మ‌నోవేద‌కు గుర‌వుతున్న‌ట్లు చెప్పింది. లాస్ఏంజిల్స్‌ కోర్టుకు వినిపించిన ఫోన్‌ సందేశంలో ఆమె తన బాధ‌లను చెప్పుకున్న‌ది. గ‌త 13 ఏళ్ల నుంచి త‌న తండ్రి వ‌ల్ల మాన‌సిక క్షోభ‌ను అనుభ‌విస్తున్న‌ట్లు ఆమె పేర్కొన్న‌ది. సంర‌క్ష‌ణ స్థానం నుంచి త‌న తండ్రిని త‌ప్పించాల‌ని, ఆయ‌న వ‌ద్ద ఉన్న నియంత్రణాధికారాల‌ను తొల‌గించాల‌ని బ్రిట్నీ కోర్టును వేడుకున్న‌ది. 2008 నుంచి పాప్ సింగ‌ర్ బ్రిట్నీ త‌న తండ్రి జేమ్స్ స్పియ‌ర్స్ క‌స్ట‌డీలో ఉంటున్న‌ది. అయితే త‌న‌పై త‌న తండ్రికి ఉన్న న్యాయ‌ప‌ర‌మైన నియంత్ర‌ణ‌ను తొల‌గించాల‌ని ఆమె కోర్టును అభ్య‌ర్థించింది.

నా జీవితాన్ని నాకివ్వండి

బ్రిట్నీ ఆర్థిక వ్య‌వ‌హారాల‌న్నీ తండ్రి జేమ్స్ చూసుకుంటున్నారు. తాను షాక్‌లో ఉన్నాన‌ని, తీవ్ర వేద‌న‌కు గురైన‌ట్లు ఆమె త‌న ఫోన్ సందేశంలో పేర్కొన్న‌ది. 13 ఏళ్ల న‌ర‌కం ఇక చాలు అని, త‌న జీవితాన్ని త‌న‌కు వెన‌క్కి ఇప్పించాల‌ని ఆమె కోర్టును కోరింది. బ్రిట్నీ స్పియ‌ర్స్ త‌న తండ్రి వ‌ల్ల ఇబ్బందులు ప‌డుతున్న‌ద‌ని, ఆమెను తండ్రి చెర నుంచి విముక్తి చేయాల‌ని చాన్నాళ్ల నుంచి ఆన్‌లైన్‌లో ఫ్రీ బ్రిట్నీ ఉద్యమం కొన‌సాగుతున్న విష‌యం తెలిసిందే. సంర‌క్ష‌ణాధికారాల‌ను త‌న తండ్రి దుర్వినియోగం చేసిన‌ట్లు బ్రిట్నీ ఆరోపించారు. పాప్ సింగ‌ర్ బ్రిట్నీ వ‌య‌సు 39 ఏళ్లు.