NOTA | పోటీ నుంచి తప్పుకుని బీజేపీలో చేరిన అభ్యర్థి.. ‘నోటా’తో గుణపాఠం చెప్పాలని కాంగ్రెస్‌ పిలుపు

NOTA | కాంగ్రెస్‌ అభ్యర్థి ఆ పార్టీకి షాక్‌ ఇచ్చారు. నామినేషన్‌ వేసిన ఆయన పోటీ నుంచి తప్పుకున్నారు. పార్టీకి రాజీనామా చేసి బీజేపీలో చేరారు. దీంతో ఆ పార్టీ అభ్యర్థి పోటీలో లేకుండాపోయారు. ఈ నేపథ్యంలో ‘నోటా’తో బీజేపీకి గుణపాఠం చెప్పాలని కాంగ్రెస్‌ పార్టీ పిలుపునిచ్చింది.

భోపాల్‌: కాంగ్రెస్‌ అభ్యర్థి చివరి నిమిషంలో ఆ పార్టీకి షాక్‌ ఇచ్చారు. నామినేషన్‌ వేసిన ఆయన పోటీ నుంచి తప్పుకున్నారు. కాంగ్రెస్‌ పార్టీకి రాజీనామా చేసి బీజేపీలో చేరారు. దీంతో ఆ పార్టీ తరుఫున ఏ అభ్యర్థి పోటీలో లేకుండాపోయారు. ఈ నేపథ్యంలో ‘నోటా’తో (NOTA) బీజేపీకి గుణపాఠం చెప్పాలని కాంగ్రెస్‌ పార్టీ పిలుపునిచ్చింది. మధ్యప్రదేశ్‌లోని ఇండోర్‌ లోక్‌సభ కాంగ్రెస్‌ అభ్యర్థిగా అక్షయ్ కాంతి బామ్ నామినేషన్ దాఖలు చేశారు. అయితే ఉపసంహరణ రోజున అనూహ్యంగా పోటీ నుంచి తప్పుకున్నారు. కాంగ్రెస్‌ పార్టీని వీడి బీజేపీలో చేరారు.

కాగా, ప్రత్యామ్నాయ అభ్యర్థిని పోటీకి దించేందుకు కాంగ్రెస్‌ పార్టీ హైకోర్టులో పిటిషన్‌ వేసినప్పటికీ ఫలితం లేకపోయింది. దీంతో ఇండోర్‌లో కాంగ్రెస్‌ తరుఫున అభ్యర్థి లేకుండాపోయారు. బీజేపీ అభ్యర్థి సిట్టింగ్ ఎంపీ శంకర్ లాల్వానీ, మరో 13 మంది అభ్యర్థులు ఎన్నికల బరిలో నిలిచారు. అయితే వారంతా తమకు పోటీ కాదని బీజేపీ భావిస్తున్నది.

మరోవైపు ఇండోర్‌లో పార్టీ అభ్యర్థి పోటీలో లేకుండా మోసం చేసిన బీజేపీకి గుణపాఠం చెప్పాలని కాంగ్రెస్ పార్టీ నిర్ణయించింది. దీంతో నాలుగో దశలో భాగంగా సోమవారం ఇండోర్‌ స్థానానికి జరిగే పోలింగ్‌లో ‘నోటా’ గుర్తును నొక్కాలని పార్టీ కార్యకర్తలు, ప్రజలకు పిలుపునిచ్చింది. ‘నోటాకు రికార్డు స్థాయిలో ఓటు వేసి బీజేపీకి గుణపాఠం చెప్పండి. ప్రజాస్వామ్యాన్ని కాపాడండి’ అని ఆ రాష్ట్ర కాంగ్రెస్ చీఫ్ జితు పట్వారీ, ఇతర నాయకులు ప్రజలను కోరారు. ఈ మేరకు ఎక్స్‌లో పోస్ట్‌ చేశారు.