Baby Food | ఆరు నెల‌ల్లోపు పిల్ల‌ల ఆహారంలో వీటిని క‌లుపొద్దు : FSSAI

Baby Food | ఆరు నెలల్లోపు వయసున్న పిల్ల‌ల‌కు సంబంధించిన ఆహార ఉత్పత్తుల్లో ఫ్రక్టోజ్‌ (Fructose), సుక్రోజ్‌ (Sucrose) లను కలుపొద్ద‌ని ‘భారత ఆహార భద్రత, ప్రమాణాల సంస్థ (FSSAI)’ ప్రతిపాదించింది. ఈ మేరకు ‘ఫుడ్ సేఫ్టీ అండ్ స్టాండర్డ్స్ (ఫుడ్స్ ఫర్ ఇన్‌ఫాంట్ న్యూట్రిషన్) రెగ్యులేషన్స్ యాక్ట్‌ 2020’ కి సవరణ ముసాయిదాను ప్రచురించింది.

Baby Food : ఆరు నెలల్లోపు వయసున్న పిల్ల‌ల‌కు సంబంధించిన ఆహార ఉత్పత్తుల్లో ఫ్రక్టోజ్‌ (Fructose), సుక్రోజ్‌ (Sucrose) లను కలుపొద్ద‌ని ‘భారత ఆహార భద్రత, ప్రమాణాల సంస్థ (FSSAI)’ ప్రతిపాదించింది. ఈ మేరకు ‘ఫుడ్ సేఫ్టీ అండ్ స్టాండర్డ్స్ (ఫుడ్స్ ఫర్ ఇన్‌ఫాంట్ న్యూట్రిషన్) రెగ్యులేషన్స్ యాక్ట్‌ 2020’ కి సవరణ ముసాయిదాను ప్రచురించింది. పసితనంలోనే అదనపు చక్కెరలు తీసుకోవడాన్ని తగ్గించడం ద్వారా శిశువుల ఆరోగ్యాన్ని పరిరక్షించడం, పోషకాహార భద్రతను బలోపేతం చేయడమే ఈ ప్రతిపాదనల లక్ష్యమని కేంద్ర ఆరోగ్య, కుటుంబ సంక్షేమశాఖ తెలిపింది.

బిడ్డ ఎదుగుదలకు మొదటి ఆరు నెలలు ఎంతో కీలకమ‌ని, ఈ వయసు వారికి అవసరమైన పోషకాలు అందించేలా సంబంధిత ఆహార ఉత్పత్తుల్లో ఫ్రక్టోజ్‌, సుక్రోజ్‌లను కలపకుండా చూసేలా ఈ ప్రతిపాదనలను రూపొందించారని ఆరోగ్య‌ కుటుంబ సంక్షేమ శాఖ తెలిపింది. మొదటి ఆరు నెలలు కేవలం తల్లిపాలు మాత్రమే ఇవ్వాలనే ప్రభుత్వ సిఫార్సులను ప్రోత్సహించేందుకూ ఈ చర్యలు తోడ్పడతాయని పేర్కొన్న‌ది. బాల్యంలోనే ఊబకాయం, సంబంధిత ఆరోగ్య సవాళ్లను అరికట్టడం కూడా ఈ ప్రతిపాదనల ఉద్దేశమ‌ని వెల్ల‌డించింది.

అదేవిధంగా ముసాయిదా ప్రతిపాదనలపై 60 రోజుల్లోపు అభ్యంతరాలను, సూచనలను సమర్పించవచ్చని కేంద్ర ఆరోగ్య, కుటుంబ‌సంక్షేమ శాఖ‌ పేర్కొన్న‌ది.