కేంద్ర మంత్రి పదవికి రాజీనామా చేయమన్నారు.. చాలా బాధపడ్డా : బాబుల్ సుప్రియో

కోల్‌కతా: కేంద్ర మంత్రి పదవికి రాజీనామా చేయమన్నారని, తాను చాలా బాధపడ్డానునని బాబుల్ సుప్రియో ఆవేదన వ్యక్తం చేశారు. అనంతరం దీనిపై స్పష్టత ఇచ్చిన ఆయన ఎలాంటి అవినీతి మరక లేకుండా బయటకు వెళ్తునందుకు చాలా సంతోషంగా ఉన్నదని తన ఫేస్‌బుక్‌ ఖాతాలో పోస్ట్‌ చేశారు. మెగా కేంద్ర మంత్రివర్గ విస్తరణ నేపథ్యంలో పలువురు మంత్రులతోపాటు పర్యావరణ శాఖ సహాయ మంత్రిగా ఉన్న బాబుల్ సుప్రియో బుధవారం తన పదవికి రాజీనామా చేశారు. కేంద్ర మంత్రి వర్గం నుంచి వైదొలగుతున్నందుకు చాలా బాధగా ఉన్నదని ఆయన తెలిపారు. అయితే ఎలాంటి అవినీతి మరక లేకుండా బయటకు వెళ్తున్నందుకు చాలా సంతోషంగా ఉన్నదని చెప్పారు.

కాగా, తనను రాజీనామా చేయమన్నారంటూ తొలుత ఆవేదన వ్యక్తం చేసి తొలగించిన పోస్ట్‌పై బాబుల్‌ సుప్రియో వివరణ ఇచ్చారు. తాను అలా పేర్కొనడం సరికాదని స్పష్టత ఇచ్చారు. కేంద్ర మంత్రిగా దేశానికి సేవ చేసే అవకాశం ఇచ్చిన ప్రధాని మోదీకి ధన్యవాదాలు ఆయన తెలిపారు. అలాగే పశ్చిబెంగాల్‌కు చెందిన కొందరు నేతలు కేంద్ర మంత్రులు కానుండటంపై హర్షం వ్యక్తం చేసిన బీజేపీ ఎంపీ బాబుల్‌ సుప్రీయో వారికి అభినందనలు తెలిపారు. కేంద్ర మంత్రి వర్గం నుంచి వైదొలగడం తనకు బాధగా ఉన్నా, బెంగాల్‌ నేతలకు కేంద్ర మంత్రి పదవులు దక్కడంపై చాలా సంతోషంగా ఉన్నదని సోషల్‌ మీడియా పోస్ట్‌లో వెల్లడించారు.