Shimla mosque row | మసీదు అక్రమ నిర్మాణ భాగాన్ని మేమే కూల్చివేస్తాం.. కమిషనర్‌కు ముస్లిం కమిటీ లేఖ

Shimla mosque row | హిమాచల్‌ ప్రదేశ్‌లోని సిమ్లాలో అక్రమంగా మసీదు నిర్మించారంటూ నిరసనలు వెల్లువెత్తడంపై ముస్లిం కమిటీ స్పందించింది. మసీదు అక్రమ నిర్మాణ భాగాన్ని తామే కూల్చివేస్తామని పేర్కొంది. సిమ్లా మున్సిపల్ కార్పొరేషన్ కమిషనర్‌ను కలిసి ఈ మేరకు వినతి పత్రం సమర్పించింది.

సిమ్లా: హిమాచల్‌ ప్రదేశ్‌లోని సిమ్లాలో అక్రమంగా మసీదు నిర్మించారంటూ (Shimla mosque row) నిరసనలు వెల్లువెత్తడంపై ముస్లిం కమిటీ స్పందించింది. మసీదు అక్రమ నిర్మాణ భాగాన్ని తామే కూల్చివేస్తామని పేర్కొంది. సిమ్లా మున్సిపల్ కార్పొరేషన్ కమిషనర్‌ను కలిసి ఈ మేరకు వినతి పత్రం సమర్పించింది. సిమ్లాలోని సంజౌలి ప్రాంతంలోని మసీదును అక్రమంగా నిర్మించినట్లు హిందూ సంఘాలు ఆరోపించాయి. దేవ్ భూమి సంఘర్ కమిటీ పిలుపుమేరకు బుధవారం ఆ ప్రాంతంలో భారీ స్థాయిలో నిరసన చేపట్టారు. ఆందోళనకారులు పోలీసులతో ఘర్షణకు దిగడంతోపాటు రాళ్లు రువ్వారు. దీంతో పోలీసులు లాఠీచార్జ్‌ చేసి వారిని చెదరగొట్టారు. మహిళలు, పోలీసులతో సహా సుమారు పది మంది గాయపడ్డారు.

కాగా, ఈ సంఘటన నేపథ్యంలో ముస్లిం సంక్షేమ కమిటీ ప్రతినిధులు గురువారం సిమ్లా మున్సిపల్ కార్పొరేషన్ కమిషనర్ భూపేందర్ కుమార్ అట్రీని కలిశారు. అనధికారిక భాగాన్ని సీల్ చేయాలని కోరారు. అలాగే కోర్టు తీర్పునకు అనుగుణంగా అక్రమ నిర్మాణాన్ని తామే కూల్చివేస్తామని తెలిపారు. ఈ మేరకు మెమోరాండం సమర్పించారు.

మరోవైపు ఈ ప్రాంతంలో నివసిస్తున్న ముస్లింలు హిమాచల్ ప్రదేశ్‌లో శాశ్వత నివాసితులని ముస్లిం కమిటీ సభ్యులు తెలిపారు. ఈ నేపథ్యంలో ఈ ప్రాంతంలో మత సామరస్యం, సోదరభావాన్ని కాపాడేందుకు ఈ నిర్ణయం తీసుకున్నట్లు ముస్లిం సంక్షేమ కమిటీ సభ్యుడు ముఫ్తీ మహ్మద్ షఫీ కాస్మీ మీడియాతో అన్నారు. తమపై ఎవరి ఒత్తిడి లేదని ఆయన చెప్పారు.

కాగా, మసీదులో అక్రమ నిర్మాణాలకు వ్యతిరేకంగా నిరసనకు పిలుపునిచ్చిన దేవ్ భూమి సంఘర్ కమిటీ ఈ చర్యను స్వాగతించింది. ‘ముస్లిం సమాజం చర్యను మేం స్వాగతిస్తున్నాం. పెద్ద ఆసక్తితో ఈ చొరవ తీసుకున్నందుకు వారిని కౌగిలించుకునే మొదటి వ్యక్తి నేనే అవుతా’ అని కమిటీ సభ్యుడు విజయ్ శర్మ అన్నారు.