12 మెడిక‌ల్ షాపుల లైసెన్సులు ర‌ద్దు

ఢిల్లీ : ప్రిస్క్రిప్ష‌న్ లేకుండా డ్ర‌గ్స్ అమ్ముతున్న 12 మెడిక‌ల్ షాపుల లైసెన్సుల‌ను డ్ర‌గ్స్ కంట్రోల్ అథారిటీ ర‌ద్దు చేసింది. ఈ ఘ‌ట‌న ఢిల్లీలో బుధ‌వారం చోటుచేసుకుంది. డాక్టర్ ప్రిస్క్రిప్షన్ లేకుండా కొవిడ్ మేనేజ్‌మెంట్ డ్ర‌గ్స్‌ను విక్రయించినందుకు 12 మెడిక‌ల్ షాపుల లైసెన్స్‌లను ర‌ద్దు చేసిన‌ట్లు అధికారులు తెలిపారు.

ప్రిస్క్రిప్షన్లు లేకుండా మందులు అమ్మినందుకు గ‌త వార‌మే 25 మెడిక‌ల్ షాపుల లైసెన్స్‌లను ర‌ద్దు చేసిన అధికారులు మ‌రో 12 దుకాణాల‌ను షోకాజ్ నోటీసులు జారీ చేశారు. నోటీసుల‌కు స‌రైన స‌మాధానం రాని నేప‌థ్యంలో తాజాగా ఈ 12 దుకాణాల లైసెన్సుల‌ను ర‌ద్దు చేశారు.

దేశ రాజధానిలో బ్లాక్ ఫంగస్ కేసులు పెరుగుతున్న నేపథ్యంలో అధికారులు ఈ చర్య తీసుకున్నారు. కొవిడ్ రోగులలో విచక్షణారహితంగా స్టెరాయిడ్ల వాడకాన్ని నిపుణులు త‌ప్పుబ‌డుతున్నారు. డ్రగ్స్ కంట్రోల్ విభాగం డెకాయ్ ఆప‌రేష‌న్ నిర్వ‌హించి కస్టమర్లను మెడిక‌ల్ షాపులకు పంపుతోంది. ప్రిస్క్రిప్షన్ లేకుండానే దుకాణాదారులు డ్రగ్స్‌ను విక్ర‌యిస్తున్న‌ట్లు డ్రగ్స్ కంట్రోల్ కార్యాలయ అధిపతి అతుల్ కుమార్ నాసా తెలిపారు.

ఈ 12 మెడిక‌ల్ షాపులు ఎటువంటి ప్రిస్క్రిప్షన్ లేకుండా కొవిడ్ చికిత్స‌లో వాడే స్టెరాయిడ్ డ్ర‌గ్స్‌ను విక్రయిస్తున్నట్లు క‌నుగొన్నారు. డాక్టర్ ప్రిస్క్రిప్షన్ లేకుండా స్టెరాయిడ్ డ్ర‌గ్స్‌ను అమ్మడం డ్రగ్స్ అండ్ కాస్మటిక్స్ చట్టానికి విరుద్ధం అని ఆయ‌న చెప్పారు.